„კანონპროექტები, რომლებზეც საზოგადოებრივი მოძრაობა მუშაობს, დასავლურ პრაქტიკას ეფუძნება და უსაფუძვლოა არასამთავრობო ორგანიზაციების შიში, თითქოს, ახალი რეგულაციები მათ შეზღუდავს“, – განაცხადა მოძრაობა „ხალხის ძალის“ ერთ-ერთმა ლიდერმა დიმიტრი ხუნდაძემ.

მისივე თქმით, ცუდი არაფერია იმაში, რომ კანონპროექტთან დაკავშირებით მსჯელობა უკვე დაიწყო, თუმცა უსაფუძვლო შიშებისგან, თითქოს ვინმე იზღუდება, არასამთავრობო ორგანიზაციები უნდა გათავისუფლდნენ.

„ფაქტია და ყველა ვხედავთ, რომ დღეს, სამწუხაროდ, საქართველოში ქართული პოლიტიკის ფორმირება, ხშირად, სიცრუის წარმოებით ხდება – ძალიან ხშირად, ქვეყნის გარედან დაფინანსებული ესა თუ ის ორგანიზაცია საკუთარ ფინანსურ დანახარჯებს, აქტივებს გამჭვირვალედ არ წარმოადგენს. ტელევიზიები პოლიტიკურ ამინდს არ უნდა ქმნიდნენ და სწორი ინფორმაციის მიწოდებით უნდა იყვნენ დაკავებულნი – ეს საკითხი დასავლეთში რეგულირებულია. იმაზე, რაც დასავლურია და, ამავე დროს, მოსაწონი, უარი არ უნდა ვთქვათ. კრიტიკოსებისთვის მეტი ინფორმაციაა საჭირო. ისინი აგენტობას მხოლოდ და მხოლოდ რუსული ტერმინით – „ჯაშუშობით“ აფასებენ, არადა, დასავლეთში აგენტი ერთმნიშვნელოვნად ჯაშუშს არ ნიშნავს. იგივენაირი კანონია, მაგალითად, აშშ-ში, რომელიც ფედერალური კანონის სახით 1938 წლიდან მოქმედებს. სიცრუე მინიმალიზებული უნდა იყოს და ამას თავისი ნეგატიური ფასი უნდა ჰქონდეს – დასავლეთში ესეც აპრობირებული პრაქტიკაა. ჩვენ ამ კუთხით ბრიტანულ კანონმდებლობას მოვიშველიებთ. ასე რომ, ამერიკული, ბრიტანული, დასავლური კანონის ნუ გვეშინია და ერთმნიშვნელოვნად ნუ დავარქმევთ მას რუსულს. თუ არადა, კონკრეტულად გვითხრან, მით უმეტეს, როცა კანონი განხილვაში იქნება – რა ნაწილშია ის რუსული“, – განაცხადა ხუნდაძემ.

გაზიარება