არჩილ თალაკვაძე: „სინამდვილეში, ძალიან ბევრმა იცის, რომ სააკაშვილი იყო პუტინის მთავარი მოკავშირე საქართველოში. საქმეები და დარღვევები, რაც მან და მისმა გუნდმა ჩაიდინეს, მხოლოდ და მხოლოდ რუსეთის ინტერესებში შედიოდა.
საქართველოს დელეგაციამ უკრაინასთან დაკავშირებული რეზოლუციის თავდაპირველ ვერსიას პოლიტიკურ კომიტეტის სხდომაზე მხარი დაუჭირა. რა თქმა უნდა, ჩვენ იქ მოცემულ თითოეულ წინადადებას მხარს ვუჭერთ. ბევრად წონიანი რეზოლუციები იყო, რომლებსაც საქართველომ მხარი დაუჭირა. ამიტომ კითხვის ნიშნის ქვეშ არ დგას და ვერ დადგება საქართველოს მხარდაჭერა უკრაინის მიმართ. რაც კითხვის ნიშნის ქვეშ დააყენა „ნაციონალურმა მოძრაობამ“, ზუსტად ეს არის ჩვენს ქვეყნებს შორის მეგობრობა და საქართველოს საერთაშორისო იმიჯი, რაზეც, ზუსტად ამ გათვლით, მათ დააინიცირეს და შემოიტანეს ეს ცვლილება.
ეს იყო „ნაციონალური მოძრაობის“ რამდენიმე დეპუტატისა და სააკაშვილთან პირადად, სუბიექტურად დაკავშირებული პოლიტიკოსის გაკეთებული.
ამ რეზოლუციაზე საუბრის დროს რადიკალური ოპოზიციის წარმომადგენლებს აქვთ სხვადასხვა მოტივი: ერთს უნდა, რომ თავისი რუსული შემოსავლები გადაფაროს; მეორეს უნდა, რომ საქართველოს საგარეო პოლიტიკის წარმატებებს მიაყენოს ჩრდილი; მესამეს უნდა, თავი მოიწონოს სააკაშვილის წინაშე. სინამდვილეში, ის, რა კომენტარებსაც ვუსმენდით, არის სიცრუე. სამწუხაროა, რომ ისეთი მნიშვნელოვანი საკითხის შესახებ გადაწყვეტილებაზე, როგორიც უკრაინის მხარდაჭერაა, სადაც ევროპის საბჭოს ყველა წევრი ქვეყანა ვიყავით ერთ მუშტად შეკრული, პოლიტიკური კომიტეტის სხდომაზე სრული მხარდაჭერა ჰქონდა ამ რეზოლუციას. სამწუხაროა, რომ სააკაშვილის საკითხის ხელოვნურად შემოტანის შემდეგ ამან ძალიან ტოქსიკური ზეგავლენა მოახდინა რეზოლუციაზე, გაიყო მოსაზრებები და ძალიან ბევრი ადამიანი ევროპის საბჭოში არ ეთანხმება იმ ჩანაწერს, რომელიც იყო გაკეთებული“.
