გიორგი ცუცქირიძე დევიდ ლის მიერ „ტვიტერში“ გამოქვეყნებულ სტატუსთან დაკავშირებით: „ღიად იკითხება იმ კამპანიის მიზანიც, რომელიც ევროპელ დეპუტატთა ნაწილის მხრიდან, ხელების გადაგრეხვის ტაქტიკით, საქართველოს დღევანდელი ხელისუფლების წინააღმდეგ ხორციელდება“

ეკონომისტი გიორგი ცუცქირიძე საქართველოში ევროპული ბიზნეს ასოციაციის ყოფილი ხელმძღვანელის – დევიდ ლის მიერ „ტვიტერში“ გამოქვეყნებულ სტატუსს ეხმიანება, რომლის მიხედვითაც ის კარლ ჰარცელსა და ანდრიუს კუბილიუსს ზეწოლაში ადანაშაულებს.

ცუცქირიძის თქმით, უნდათ, რომ საქართველოს დღევანდელი ხელისუფლება აიძულონ, წავიდეს მისთვის წამგებიან დათმობებზე, ან საქართველოს არ უნდა მიენიჭოს წევრობის კანდიდატის სტატუსი, რასაც ქვეყანაში დესტაბილიზაციის ახალი ტალღა და ხელისუფლების ცვლილება უკვე რევოლუციური სცენარით უნდა მოჰყვეს, თუმცა ყველაფერს მაინც ხალხის მზაობა გადაწყვეტს.

„ის, რაც ევროპის ბიზნეს ასოციაციის ყოფილმა დირექტორმა ბატონმა დევიდ ლიმ „ტვიტერის“ საკუთარ გვერდზე დაწერა, თავისუფლად შეიძლება ჩაითვალოს ამ წლის მთავარ სკანდალად. ბატონი ლი ჩვენთვის კარგად ნაცნობ კუბილიუსა ბრალდებას უყენებს ზეწოლაში, ბატონ ჰარცელთან ერთად.
მისი განცხადებიდან ვიგებთ, რომ ანდრიუს კუბილიუსმა მისწერა წერილი კარლ ჰარცელს, სადაც ნათქვამი იყო, რომ მას არ ეთანამშრომლა ევროპის ბიზნეს ასოციაციასთან ბატონი დევიდის პოლიტიკური განცხადებების გამო, მაგრამ რაც არანაკლებ საინტერესოა, თავად ევროკავშირის ელჩი იბარებს დევიდს და, ფაქტობრივად, ულტიმატუმს უყენებს, რომ ის აღარ ითანამშრომლებდა ევროპის ბიზნეს ასოციაციასთან, თუ იგი არ გადადგებოდა დირექტორის დაკავებული თანამდებობიდან, რაც გახდა კიდეც დევიდ ლის გადადგომის მიზეზი.

თუ გავითვალისწინებთ, რომ დევიდ ლი მწვავედ აკრიტიკებდა, ზოგ შემთხვევაში კი ღიად ამხელდა ქართული ოპოზიციის ნაწილის (აქ, პირველ რიგში, „ნაციონალური მოძრაობა“ და მასთან აფილირებული პოლიტელიტა კიიგულისხმება) აშკარად დესტრუქციულ ქმედებებს, დღეს უკვე ღიად იკითხება იმ კამპანიის მიზანიც, რომელიც, ხელების გადაგრეხვის ტაქტიკით, საქართველოს დღევანდელი ხელისუფლების წინააღმდეგ ხორციელდება ევროპელ დეპუტატთა ნაწილის მხრიდან, და რომლის მთავარი ამოცანაც ხელისუფლების ცვლილებაა.
ამ პოლიტიკის შემადგენელი იყო ჯერ ევროკავშირის კანდიდატის წევრობის დაბლოკვა (ქართულ ოპოზიციასთან უნისონში), დიდწილად, გამოგონილი ბრალდებებით, ხოლო თუნდაც ამ დღეებში დაწესებული 12 პუნქტის შესრულებაზე მათი შეფასებები, განსაკუთრებით, დეოლიგარქიზაციის კანონპროექტის მიმართ უკვე აშკარად წარმოაჩენს საბოლოო მიზანსაც.
„ქართული ოცნება“ დღეს რეალურად დგას ამ გამოწვევის წინაშე, თუმცა ყველაფერს მაინც ხალხის მზაობა გადაწყვეტს.

ქართულმა საზოგადოებამ, ვფიქრობ, ამ წლებში კარგად გადააფასა წარსულის გაკვეთილები, პოლიტიკურადაც გაიზარდა და არ წამოეგება ამ ახალ სატყუარასაც.
მხოლოდ საგარეო მოთხოვნაზე და საკუთარი მოსახლეობის ინტერესების უარყოფაზე ორიენტირებული ოპოფლანგის განულებული რეიტინგები კი “IRI-ის” ბოლო კვლევამაც კარგად აჩვენა“, – აცხადებს ცუცქირიძე.