“მომდევნო წლის იანვრიდან, რეფერენტული ფასები, პირველ ეტაპზე, ქრონიკულ და ონკოლოგიურ მედიკამენტებს შეეხება. დაახლოებით, განსაზღვრულია 1100 დასახელების მედიკამენტი”, – განაცხადა ჯანდაცვის მინისტრმა ზურაბ აზარაშვილმა.
„ეს არის ჩვენი ფარმაცევტული რეფორმის ერთ-ერთი ეტაპი, რომელიც მიმდინარე წელს აქტიურად დავიწყეთ, გავიარეთ სხვადასხვა ეტაპი და ახლა მისული ვართ იმ ეტაპზე, როცა უნდა შემოვიღოთ რეფერენტული ფასი და განვსაზღვროთ ნებისმიერ მედიკამენტზე, ხაზს ვუსვამ, რომ ეს შეეხება ნებისმიერ მედიკამენტს და განისაზღვრება შერჩეული ქვეყნების მიხედვით, ის მაქსიმალური ზღვარი თითოეული მედიკამენტზე, რა ზღვრის ფარგლებში შეუძლია საბითუმოდ მოვაჭრეს მედიკამენტის გაყიდვა.
ფასი გამომდინარეობს იმ ქვეყნებიდან, რომელსაც შევარჩევთ და ეს არის 4-5 ქვეყანა, რომელიც სხვადასხვა კრიტერიუმის მიხედვით ავირჩევთ და ამ ქვეყნებში იმ კონკრეტულ მედიკამენტებზე ფასი განსაზღვრავს უკვე ჩვენს ქვეყანაში საბითუმო გასაყიდ ფასს“, – განაცხადა ზურაბ აზარაშვილმა.
შეგახსენებთ, რომ მედიკამენტებზე ხელმისაწვდომობის გაზრდის მიზნით, ჯანდაცვის სამინისტრო რეფორმაზე მუშაობს, რომელიც 2023 წლიდან წამლებზე რეფერენტული ფასების დადგენას გულისხმობს.
