“ჩვენ გვაქვს, რა თქმა უნდა, გარკვეული პრინციპები. პირველ რიგში, როდესაც საუბარი ეხება სახალხო დამცველს, თუ იუსტიციის უმაღლესი საბჭოს წევრს. კრიტერიუმი არის ის, რომ შესაბამისი ორგანოების წევრებმა, თუ თანამდებობების პირებმა, საკუთარი ფუნქციები უნდა შეასრულონ პოლიტიკურად მიუკერძოებლად,’’ – განაცხადა ,,ქართული ოცნების’’ თავმჯდომარემ ირაკლი კობახიძემ საზოგადოებრივი მაუწყებლის ეთერში.
ირაკლი კობახიძის თქმით, სახალხო დამცველის არჩევის დროს ვერ გაკეთდება კომპრომისი არაკეთილსინდისიერებაზე, არაპროფესიონალიზმზე და მიკერძოებაზე.
,,რა თქმა უნდა, ერთ-ერთი მთავარი კრიტერიუმი, პროფესიონალიზმი იქნება. მაგალითად ნახეთ, რომ კლანური პრინციპით შეარჩიეს სამი კანდიდატი მდიდარმა ენჯეოებმა და იმ სამიდან, ერთ-ერთმა გასაუბრებაზე მოსვლაც კი ვერ გაბედა იმდენად არაკომპეტენტურია. ყველამ იცის იურიდიულ საზოგადოებაში რამდენად არაკომპეტენტურია ეს კონკრეტული კანდიდატი. გასაუბრებაზე მოსვლაც კი ვერ გაბედა პარლამენტში, რითაც პარლამენტს შეურაცხყოფა მიაყენა. ასეთი რაღაცეები ხდება. ჩვენთვის მთავარი რა არის, რომ ორი კრიტერიუმი ავიღოთ, ეს არის მიუკერძოებლობა და კომპეტენცია და კეთილსინდისიერებაც ამ ყველაფერს უკავშირდება და ამის მიხედვით უნდა მივიღოთ გადაწყვეტილება. სადაც ვერ წავალთ ჩვენ კომპრომისზე ეს არის სწორედ ეს ორი კრიტერიუმი. ყველაფერ დანარჩენზე, ბუნებრივია, კომპრომისზე შეგვიძლია წავიდეთ და ამას გავაკეთებთ ისევ და ისევ იმისათვის, რომ თუნდაც, ის 12 პუნქტი შესრულდეს, წინ წავიწიოთ კიდევ უფრო მეტად კანდიდატის სტატუსის მისაღებად და ა.შ.’’ – განაცხადა კობახიძემ.
