„ქართული ოცნების“ ახალგაზრდული ორგანიზაციის თავმჯდომარე გიორგი ჩაკვეტაძე მადრიდში, ახალგაზრდა სოციალისტთა საერთაშორისო გაერთიანების პრეზიდიუმის სხდომებში მონაწილეობს.
პრეზიდიუმი ესპანეთის პრემიერ-მინისტრმა პედრო სანჩესმა, ევროპარლამენტის წევრებთან და საერთაშორისო სოციალისტთა გენერალური მდივნობის კანდიდატთან, ბენედიქტთა ლასთან ერთად გახსნა.
პრეზიდიუმის ფარგლებში შეხვედრები გაიმართება საერთაშორისო სოციალისტთა მოქმედ თავმჯდომარესთან გეორგიოს პაპანდრეუსთან, ევროპარლამენტარებთან და ესპანეთის სოციალისტურ მუშათა პარტიის სხვადასხვა წარმომადგენელთან.
საერთაშორისო გაერთიანების წევრები ორი დღის განმავლობაში სხვადასხვა რეგიონში არსებულ სიტუაციას განიხილავენ, მოისმენენ ახალგაზრდა სოციალისტთა საერთაშორისო გაერთიანების პრეზიდენტის, გენერალური მდივნისა და საკონტროლო კომისიის ანგარიშებს. პრეზიდიუმი იმსჯელებს 2023 წლის სამოქმედო გეგმაზეც.
„ქართული ოცნების“ ახალგზრდული ორგანიზაცია ახალგაზრდა სოციალისტთა საერთაშორისო გაერთიანების პრეზიდიუმზე პირველადაა მიწვეული, რაც პარტიის ახალგაზრდული ორგანიზაციის მიერ მშვიდობის კომიტეტის შექმნას უკავშირდება. მშვიდობის კომიტეტის პირველ პროექტს საქართველომ მიმდინარე წლის სექტემბერში უმასპინძლა, რომლის შემდეგაც კომიტეტის სამომავლო საქმიანობის გეგმა განისაზღვრა.
აღსანიშნავია, რომ ახალგაზრდა სოციალისტთა საერთაშორისო გაერთიანება 100-ზე მეტი ქვეყნის 200-მდე ახალგაზრდულ პოლიტიკურ ორგანიზაციას აერთიანებს, რომელიც, თავის მხრივ საერთაშორისო სოციალისტთა წარმომადგენელი ორგანიზაციაა.
„ქართული ოცნების“ ახალგაზრდული ორგანიზაციის თავმჯდომარე გიორგი ჩაკვეტაძე მადრიდში, ახალგაზრდა სოციალისტთა საერთაშორისო გაერთიანების პრეზიდიუმის სხდომებში მონაწილეობს
