„საქართველოს დამაჯერებელი ეკონომიკური ზრდა, ის, რომ ათეული წლების განმავლობაში უპირატესად საერთაშორისო ურთიერთობათა ობიექტად აღქმული ქვეყანა სულ უფრო დამაჯერებლად წარმოჩნდება როგორც საერთაშორისო ურთიერთობების აქტიური და სერიოზული სუბიექტი, ბევრს არ მოსწონს და მოსვენება უკარგავს. ამ ბოლო დროს ქვეყნის გარეთ ზოგიერთი არამეგობრული ძალის მანიაკალურ მცდელობას, საქართველო ჩათრეულ იქნას რუსეთის ფედერაციასთან ღია კონფრონტაციაში, დაემატა ახალი ნარატივი – თითქოს, საქართველოს გავლით, რუსეთში სანქცირებული საქონელი შედის, და ამ დეზინფორმაციულ ფერხულში, ნებსით თუ უნებლიეთ, აღმოჩნდა ჩაბმული ისეთი სოლიდური მედია საშუალებაც კი, როგორიცაა „CNN-ი“, რომლის ჟურნალისტმა ამაზე შეკითხვაც კი დაუსვა ევროკომისიის პრეზიდენტს ურსულა ფონ დერ ლაიენს“, – წერს “ფეისბუკში” ეკონომიკის ექსპერტი სოსო არჩვაძე.

„რა შეიძლება ითქვას ამის თაობაზე?
ასეთი ორკესტრირებული შეტევა ქართულ სახელმწიფოზე, სამწუხაროდ, ქვეყნის შიგნიდან ზოგიერთი ოპოზიციური ძალის აკომპანირებით, მიმართულია საქართველოს ხელისუფლებისა და ქართული სახელმწიფოს წინააღმდეგ. იგი რამდენიმე მიზანს ისახავს: ჩაითრიოს საქართველო საომარ კონფლიქტში, შეაფერხოს ქვეყანაში ეკონომიკური წინსვლა, მოახდინოს ქვეყნის მოსახლეობის უკმაყოფილების ტალღის აგორება და ხელისუფლების დისკრედიტაცია.

რა შეიძლება ითქვას რუსეთში, საქართველოს გავლით, სანქცირებული საქონლის მოხვედრაზე?

2022 წელს საქართველოს ექსპორტი მთლიანად გაიზარდა 31.8%-ით, აქედან რუსეთის ფედერაციაში – მხოლოდ 6.8%-ით, ხოლო დანარჩენ მსოფლიოში – 41.6%-ით (მათ შორის საქართველოს დანარჩენ სახმელეთო მეზობლებში: აზერბაიჯანში – 27%-ით, თურქეთში – 35%-ით, სომხეთში – 129%-ით). იმის გათვალისწინებით, რომ თვით აშშ-ში 2022 წელს ინფლაციამ 8.0% შეადგინა, გამოდის, რომ რეალურად, საქართველოს ექსპორტი რუსეთის ფედერაციაში 2022 წელს კი არ გაიზარდა, არამედ შემცირდა კიდეც. რუსეთის წილი საქართველოს ექსპორტში ერთ წელიწადში შემცირდა 14.4%-დან 11.7%-მდე, – და ეს იმ დროს, როდესაც ევროკავშირის ქვეყნები აგრძელებენ მრავალმილიარდიან, ინტენსიურ ვაჭრობას რუსეთის ფედერაციასთან.

მაგალითად, მხოლოდ ბალტიის ქვეყნების ექსპორტი რუსეთის ფედერაციაში მოსახლეობის ერთ სულზე საქართველოს ანალოგიურ მაჩვენებელს 3.3-ჯერ აღემატება. იმის გათვალისწინებით, რომ საქართველოს რუსეთის იმპორტში მხოლოდ 0.3% უჭირავს, ხოლო ქართული ექსპორტი ძირითადად აგროსასურსათო საქონლითაა წარმოდგენილი, ადვილი წარმოსადგენია, რომ ბრალდება, თითქოს საქართველო „ეხმარება რუსეთს“ სანქციების გვერდის ავლაში, აბსოლუტური ტყუილია, რომელსაც რეალობასთან არაფერი აქვს საერთო და თითიდან გამოწოვილია.

რა თქმა უნდა, ამგვარ ტყუილს თავისი „ტაქტიკური და სტრატეგიული“ დანიშნულება აქვს. მისი მიზანია გაუთვითცნობიერებელი ადამიანის შეცდომაში შეყვანა და ამით მისი მანიპულირება ზემოთ უკვე ნახსენები მიზნების მისაღწევად. თუმცა ასეთების მისამართით შეიძლება გავიხსენოთ მთაწმინდაზე დაკრძალული რუსი მწერლის ცნობილ ნაწარმოებში ერთი პერსონაჟის მეორისადმი სარკასტული ნათქვამი: მოიტყუე, მაგრამ ზომა იცოდე!“ – წერს არჩვაძე.

გაზიარება