“ვერის პარკის რეაბილიტაცია იწყება”, – განაცხადა დღევანდელ სხდომაზე თბილისის მერმა კახა კალაძემ.
მისი თქმით, ვერის პარკი დაცულია კულტურული მემკვიდრეობის უძრავი ძეგლის სტატუსით და მისი ძირეული გარდაქმნა ან შეცვლა არ იგეგმება.
როგორც კალაძემ განმარტა, სარეაბილიტაციო სამუშაოები 2025 წლის ბოლომდე დასრულდება.
“ვერის პარკი, რომელიც ქალაქის ცენტრალურ ნაწილში მდებარეობს, ერთ-ერთი უძველესი და ისტორიული რეკრეაციული სივრცეა. მე-20 საუკუნის დასაწყისიდან ვერის პარკს გააჩნია როგორც საუბნო, ისე საქალაქო მნიშვნელობა. თავისი ფუნქციური დანიშნულებით ის გათვლილია ნებისმიერი ასაკის ადამიანზე.
ყველა დაგვეთანხმება, რომ ვერის პარკი საჭიროებს განახლებას, მოწესრიგებას.
არ მინდა, რომ აღნიშნულ სამუშაოებს სპეკულაციები მოჰყვეს, – რაღაც განსაკუთრებული გადაგეგმარება, რა თქმა უნდა, ამ პროექტის ფარგლებში არ მოხდება; შესაბამისად, აღნიშნული პროექტის ფარგლებში განსაკუთრებული ყურადღება მიექცევა არსებულ გეგმარებასა და აქტივობების შენარჩუნებას, გაუმჯობესებას და ახალი გარემოსთვის შესაფერისი ფუნქციების ინტეგრირებას.
სარეაბილიტაციო სამუშაოების ფარგლებში, მოეწყობა 2 საბავშვო მოედანი ასაკის მიხედვით – 1-დან 3 წლამდე და 3-დან 12 წლამდე ბავშვებისთვის. ასევე, მოეწყობა ძაღლების სასეირნო სივრცე, გარე განათების სისტემა, საფეხმავლო ბილიკები, შადრევანი, სასმელი წყლის სოკოები, საპარკე ავეჯი, ფანჩატური, სპორტული მოედანი, საფეხბურთო მოედანი, ბელვედერი, ადმინისტრაციული შენობა და საპირფარეშო.
არსებული მდგომარეობით, პარკს არ გააჩნია სანიაღვრე სისტემა, მოძველებულია სარწყავი სისტემა, უსისტემოდ არის განაწილებული მიწისზედა გაზმომარაგებისა და წყალმომარაგების მილები. შესაბამისად, რეაბილიტაციის ფარგლებში, სრულიად განახლდება თითოეული ზემოთ ჩამოთვლილი სისტემა, პარკს დაემატება სანიაღვრე სისტემა, ხოლო უსისტემო გაყვანილობები შეიცვლება და დაიმალება გრუნტში.
პარკში არსებული მრავალწლოვანი ხე-მცენარეები შენარჩუნდება და, ამასთან, რაც ყველაზე მნიშვნელოვანია, ახალი გამწვანებული სივრცეებიც გაჩნდება.
ვერის პარკის რეაბილიტაციის შემდეგ, თბილისს შეემატება კეთილმოწყობილი, თანამედროვე საინჟინრო სისტემებით აღჭურვილი, თანამედროვე რეკრეაციული და გასართობი სივრცე, რომელიც მორგებული იქნება სხვადასხვა ინტერესისა და ასაკის ნებისმიერ ადამიანზე”, – აღნიშნა მერმა.
