“სასწრაფო დახმარება ყველაფერს გააკეთებს, რათა მაქსიმალურად სწრაფად იყოს რეაგირება ყველა საჭიროებაზე”, – განაცხადა დევნილთა, შრომის, ჯანმრთელობისა და სოციალური დაცვის მინისტრმა მიხეილ სარჯველაძემ ოზურგეთში.

„რთული მდგომარეობაა – საქმე გვაქვს სტიქიასთან, მაგრამ, საბედნიეროდ, შემუშავდა გეგმა, რომლის მიხედვითაც, მოქალაქეების ყველა საჭიროება იქნება დაკმაყოფილებული.

ეს არ არის მარტივი ამოცანა, ამისთვის ყველა რესურსი მობილიზებულია ყველა მიმართულებით.

ამ მხრივ განსაკუთრებული მნიშვნელობა აქვს სასწრაფო სამედიცინო დახმარების გამართულ მუშაობას.

სასწრაფო დახმარება ყველაფერს გააკეთებს, რათა მაქსიმალურად სწრაფად იყოს რეაგირება ყველა საჭიროებაზე, რომლის თაობაზეც ინფორმაციას ვიღებთ. ყველა ამ მიმართულებით, ამ დღეების განმავლობაში თავდაუზოგავად იმუშავეს სასწრაფო სამედიცინო დახმარების ბრიგადებმა, დაწყებული მედიკამენტების საჭიროებიდან, უშუალოდ სამედიცინო მომსახურების გაწევით დასრულებული.

ბუნებრივი და გასაგებია, რომ დიდთოვლობის გამო, ისე ოპერატიულად ვერ ხერხდება ამ ყველაფრის განხორციელება, თუმცა, ვფიქრობ, ეს პრობლემა უახლოესი საათების განმავლობაში გამოსწორებული იქნება.

ყველგან იქნება ხელმისაწვდომი ყველა რესურსი, რაც სჭირდებათ მოქალაქეებს“, – განაცხადა სარჯველაძემ.