“ცოტა ცინიზმია, ან/და სხვა შეგნებული დეზინფორმაცია, როცა მოგების გადასახადის შემცირებაზე ვსაუბრობთ და მიზეზებს არ ვიკვლევთ – მაშინ, როდესაც ჯერ არ ვიცით, რეინვესტირების მაჩვენებელი როგორი იყო პირველ კვარტალში. იქნებ, დაგვეცადა და გვენახა, ხომ არ არის რეინვესტირების მაჩვენებელი გაზრდილი?” – წერს ეკონომიკის ექსპერტი ოთარ ანგურიძე 2025 წლის იანვარ-მარტის სახელმწიფო ბიუჯეტის საპროგნოზო შემოსავლებთან დაკავშირებით.
“ჩვენი კანონმდებლობით, მოგების გადასახადით არ იბეგრება რეინვესტირებული მოგება. შესაბამისად, პოლიტიკოსების მოტივი არა სიმართლისა და მიზეზის გარკვევა, არამედ აჟიოტაჟი და ცრუ განგაშის ატეხაა. ასეთი ხომ წარსულშიც არაერთი ყოფილა –
მით უმეტეს, როდესაც საუბარია მოგების გადასახადის თითქმის 97%-იან შესრულებაზე.
ასევე, საუბარია აქციზიდან მიღებული შემოსავლების შემცირებაზე და, ამ დროს, ეს ის ხალხია, რომელიც მუდმივად აქციზის გადასახადის შემცირებაზე საუბრობს; და დღეს აღმოჩნდა, რომ სწორედ ამ გადასახადის გადახდა გახდა ეკონომიკური პრობლემების პარადიგმა.
რაც ყველაზე მნიშვნელოვანია, მთლიანობაში, ბიუჯეტში საგადასახადო შემოსავლებმა 102%-ს გადააჭარბა, რაზეც, რა თქმა უნდა, ყურადღება არ გამახვილებულა – არც სტატიაში და არც პოლიტიკოსთა შეფასებებში, რადგან მათი წარმატების იმედი მოსახლეობაში შიშისა და სახელმწიფოს მიმართ უნდობლობაზე გადის”, – წერს ოთარ ანგურიძე.