არასამთავრობო ორგანიზაციებს “გამჭვირვალობის კანონთან” დაკავშირებით სტრასბურგის სასამართლოში საჩივარი არ გაუგზავნიათ. ინფორმაციას საკუთარ წყაროზე დაყრდნობით “პრაიმ ტაიმი” ავრცელებს.
“ადამიანის უფლებათა ევროპულ სასამართლოში, “უცხოური გავლენის გამჭვირვალობის შესახებ” კანონის გასაჩივრების შესახებ საზოგადოებას, “საია-ს” თავმჯდომარემ ნონა ქურდოვანიძემ ჯერ კიდევ 17 ოქტომბერს, არჩევნებამდე რამდენიმე დღით ადრე ამცნო.
ქურდოვანიძემ განცხადება 16 მედიაორგანიზაციის, 120 სამოქალაქო საზოგადოების ორგანიზაციისა და 4 ფიზიკური პირის სახელით გააკეთა და განაცხადა, რომ ამით „ბრძოლის ახალი ეტაპი იწყებოდა“ .
გადაიგზავნა თუ არა საჩივარი სტრასბურგში? ჩვენი წყაროს ინფორმაციით ირკვევა, რომ ადამიანის უფლებათა ევროპულ სასამართლოში დაანონსებული საჩივარი არ გადაგზავნილა და აღნიშნულ საკითხზე იქ არც ერთი დოკუმენტი არ შესულა.
საპირისპიროს ამტკიცებს ნონა ქურდოვანიძე, რომელიც ამბობს, რომ საქმე იმ დღესვე გადაიგზავნა. „საქმე გაიგზავნე იმავე დღეს, როდესაც ამაზე საჯაროდ განვაცხადეთ და სტრასბურგის სასამართლოშიც ჩასულია“.
იყო თუ არა აღნიშნული საკითხი ე.წ მდიდარი ენჯეობის მხრიდან წინასაარჩევნო მანიპულაციისთვის გამოყენებული მალე გაირკვევა. ამ დროისთვის კი აღსანიშნავია, რომ გარდა მასშტაბურად, ბრიფინგზე დაანონსებული პროცესისა, სხვა რაიმე დამადასტურებელი დოკუმენტაცია, რომ საჩივარი სტრასბურგის სასამართლოში გადაგზავნილია არ მოიპოვება”,- ნათქვამია გამოცემის მიერ გავრცელებულ ინფორმაციაში.
