აშშ-ის არჩეული პრეზიდენტის – დონალდ ტრამპის შვილმა, დონალდ ტრამპ უმცროსმა აშშ-ის მოქმედი პრეზიდენტის ადმინისტრაციის გადაწყვეტილება შეაფასა, რომლითაც უკრაინას შორ მანძილზე მოქმედი დასავლური იარაღის რუსეთის ტერიტორიაზე გამოყენების უფლება ეძლევა.
მან გააკრიტიკა ჯო ბაიდენის ადმინისტრაცია და აღნიშნა, რომ სამხედრო-სამრეწველო კომპლექსს სურს დარწმუნდეს, რომ მესამე მსოფლიო ომი მანამდე დაიწყება, სანამ დონალდ ტრამპი ოფიციალურად გახდება აშშ-ის პრეზიდენტი, რაც მას მშვიდობის დამყარების საშუალებას მისცემს.
„სამხედრო-სამრეწველო კომპლექსს, როგორც ჩანს, სურს, დარწმუნებული იყოს, რომ მესამე მსოფლიო ომი მანამდე დაიწყება, ვიდრე მამაჩემს მშვიდობის დამყარებისა და სიცოცხლის გადარჩენის შესაძლებლობა მიეცემა. საჭიროა, გაიყინოს ეს ტრილიონობით დოლარი. ეშმაკმაც დაწყევლოს! იმბეცილებო!“ – დაწერა დონალდ ტრამპ უმცროსმა “X-ზე”.
უცხოური მედიის ცნობით, ბაიდენის ადმინისტრაციამ მოხსნა შეზღუდვები, რომლებიც უკრაინას უკრძალავდა აშშ-ის მიერ მიწოდებული იარაღით რუსეთის ტერიტორიის სიღრმეში დარტყმების განხორციელებას.
