„ხალხის ძალის“ წევრი თამარ ჩიბურდანიძე მიხეილ სააკაშვილის განცხადებას – „აფხაზების გამარჯვებაში არის ერთი საფრთხე – თავიანთი წარმატებული ბრძოლით დასავლეთის სიმპათია მოიპოვონ“ – სოციალურ ქსელში ეხმაურება.
„აფხაზეთში სიტუაცია დაძაბულია. მიმდინარე დღეების განმავლობაში სალომე ზურაბიშვილის განცხადება აფხაზეთში ოპოზიციის მხარდასაჭერად და, ასევე, სააკაშვილის განცხადება იმის თაობაზე, რომ დასავლეთმა, შესაძლოა, საქართველოს ზურგი შეაქციოს და მისი სიმპათიები აფხაზეთის მიმართ გადაიხაროს, რაღაცის მანიშნებელია.
რა გააკეთა რუსეთმა აფხაზეთში, ყველამ ვიცით. მაგრამ, საინტერესოა, რატომ არ მოსწონ დღეს რუსეთი აფხაზეთის ოპოზიციას და რატომ მოსწონდა აქამდე? ვინ უმაგრებს მათ ზურგს და ვის თამაშს თამაშობენ? რა ხდება აფხაზეთში, ცალკე თემაა, მაგრამ რა განცხადებებს აკეთებენ საქართველოში ოპოზიციის ლიდერები, ეს კიდევ უფრო ყურადსაღებია.
სააკაშვილი წერს: “აფხაზების გამარჯვებაში არის ერთი საფრთხე – თავიანთი წარმატებული ბრძოლით დასავლეთის სიმპათია მოიპოვონ…” რა წამოსცდა მიხეილ სააკაშვილს და რას გულისხმობდა ის სიტყვა “საფრთხეში”? რატომ უნდა იყოს საფრთხე დასავლეთის სიმპათია აფხაზეთის მიმართ? რას უქადის დასავლეთი აფხაზეთს ისეთს, რაც შეიძლება საქართველოსთვის საფრთხე აღმოჩნდეს? მიხეილ სააკაშვილი ვალდებულია, ბოლომდე გახსნას ფრჩხილები და გვითხრას, რა არის ის საფრთხე. ფაქტია, აგენტურა ქართველი ხალხის ყველაზე დიდი ტკივილით – ტერიტორიული მთლიანობის საკითხით სახიფათო თამაშებს თამაშობს”, – წერს თამარ ჩიბურდანიძე “ფეისბუკის” გვერდზე.
