„განათლებაზე ლაპარაკობს ადამიანი, რომელიც ამბობს, – წარმოგიდგენიათ, შინაგან საქმეთა მინისტრი პარტიულია და პოლიტსაბჭოს წევრიო. ამას რომ იტყვის საპარლამენტო რესპუბლიკის „განათლებული“ დეპუტატი (სად მიიღო ასეთი „განათლება“, არ ვიცი), რომ, თურმე პარტიული რომ არის მინისტრი, ეს არის ანომალია, წარმოუდგენელი თემაა, თან – შინაგან საქმეთა მინისტრიო“, – ასე გამოეხმაურა საპარლამენტო უმრავლესობის წევრი თენგიზ შარმანაშვილი „ლელოს“ დეპუტატის – ანა ნაცვლიშვილის განცხადებას იმის თაობაზე, რომ „ქართული ოცნების“ პოლიტსაბჭოს წევრები არიან მინისტრები და რომ ეს პრობლემაა.
„ვთქვათ, ჟურნალისტები უშვებენ შეცდომას და, ხანდახან, შინაგან საქმეთა მინისტრს პირველ პოლიციელს ეძახიან, მაგრამ „განათლებული“ ქალი იგივეს ხომ არ უნდა აკეთებდე, მაგალითს ხომ უნდა აძლევდე? დამღლელია ამ ქალბატონის მიერ თავისი უპირატესობების დემონსტრირება. ნაპოლეონს აქვს ერთი რამ ნათქვამი: „არ შეუშალო შენს მოწინააღმდეგეს ხელი შეცდომის დაშვებაში“, ამიტომ, ბევრს აღარ ვილაპარაკებ, არ შევუშლი ხელს, გააგრძელოს ამ შეცდომებით სიარული“, – განაცხადა შარმანაშვილმა.
