“მოხარულები ვართ, რომ ლონდონიდან თბილისის მიმართულებით პირველი ფრენა შევასრულეთ, რომელიც ჩვენთვის ძალიან მნიშვნელოვანი ბაზარია”, – განაცხადა გაერთიანებული სამეფოს ფლაგმანური ავიაკომპანიის – “British Airways-ის” ავიამიმართულებების განვითარების დირექტორმა რეიჩელ რაილიმ.
“ცოტა ხნის წინ მგზავრებით სავსე პირველი ხომალდი დაეშვა. ეს დიდი ბრიტანეთის მოქალაქეებს საშუალებას აძლევს, ეწვიონ და აღმოაჩინონ თბილისი და დანარჩენი საქართველო, ასევე ქართველებს – ჩავიდნენ ლონდონში და იქიდან, ჩვენი ინფრასტრუქტურის მეშვეობით, იმოგზაურონ ევროპასა და აშშ-ში.
ეს შესანიშნავი დღეა ჩვენთვის, რადგან შევძელით ახალი პირდაპირი კავშირის დამყარება და ვართ პირველი პრემიუმ გადამზიდი, რომელიც გთავაზობთ ამ კავშირს საქართველოსა და დიდ ბრიტანეთს შორის“, – აღნიშნა “British Airways-ის” ავიამიმართულებების განვითარების დირექტორმა.
ცნობისთვის: დღეს თბილისის საერთაშორისო აეროპორტში კომპანიის A320 ტიპის ხომალდმა, 156 მგზავრით, პირველი რეისი განახორციელა. ავიაკომპანია “British Airways-ი” ლონდონი-თბილისი-ლონდონის მიმართულებით პირდაპირ რეგულარულ რეისებს კვირაში ოთხჯერ შეასრულებს.
