„ნატო-ში ინტეგრაციას არ აქვს ასეთივე ძლიერი მხარდაჭერა (როგორც ევროკავშირს), მაგრამ ეს იმიტომ, რომ ქართველები, უბრალოდ, დაიღალნენ ნატო-ში მიღების მოლოდინით”, – განაცხადა პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ რუმინულ გამოცემასთან.
ჟურნალისტი დაინტერესდა, რა მხარდაჭერა აქვს საზოგადოებაში ნატო-ს.
“მას შემდეგ, რაც 2008 წელს ბუქარესტში გაიმართა სამიტი, როდესაც ნატო-ს ლიდერებმა პირობა დადეს, რომ საქართველო გახდებოდა ალიანსის წევრი, გავიდა 17 წელი. ჩვენ არ მიგვიღია არანაირი სიგნალი საქართველოს ნატო-ში გაწევრიანების შესახებ.
შესაბამისად, ამან გამოიწვია იმედგაცრუება საქართველოს მოქალაქეებში, რის გამოც ჩვენ ვხედავთ ნატო-ს მხარდაჭერის შემცირებას ევროკავშირში გაწევრიანების მხარდაჭერასთან შედარებით. და თუ ეს ტენდენცია გაგრძელდება, სავარაუდოა, რომ ნატო-ში ინტეგრაციის ეს მხარდაჭერა კიდევ უფრო მეტად შემცირდება“, – აღნიშნა სამხარაძემ.
ჟურნალისტის კითხვაზე, ხომ არ მოხდება იგივე ევროკავშირთან მიმართებით უახლოეს მომავალში, დეპუტატმა უპასუხა:
„თუ მომდევნო 15 წელიწადში ჩვენ აღმოვჩნდებით იმავე პოზიციაში, ანუ გავაგრძელებთ კაკუნს ევროკავშირის კარზე და არ გვექნება პოზიტიური გამოხმაურება, რა თქმა უნდა, იგივე მოხდება ევროკავშირთან მიმართებით.
პირადად მე იმედი მაქვს, რომ ანალოგიური არ განმეორდება ევროკავშირთან დაკავშირებით. ასევე იმედი მაქვს, რომ წელს თუ არა, მომავალ წელს, მოლაპარაკებები გაიხსნება, რათა საქართველო 2030 წელს გახდეს ევროკავშირის პოტენციური წევრი“, – აღნიშნა სამხარაძემ.
