ანალიტიკოსი გია აბაშიძე საქართველოს რეგიონული განვითარებისა და ინფრასტრუქტურის სამინისტროს მიერ გავრცელებულ ინფორმაციას ეხმაურება, სადაც აღნიშნულია, რომ გომისმთამდე მისასვლელი საავტომობილო გზის 21 კმ-იანი მონაკვეთის რეაბილიტაცია აქტიურად მიმდინარეობს.
„გომისმთამდე (მაღალმთიანი კლიმატური საზაფხულო კურორტი გურიაში) მისასვლელი საავტომობილო გზის 21 კმ-იანი მონაკვეთის რეაბილიტაცია აქტიურად მიმდინარეობს. სარეაბილიტაციო მონაკვეთი ოზურგეთის მუნიციპალიტეტის ტერიტორიაზე მდებარეობს, რომელიც მთაგორიან, დაუსახლებელ რელიეფზე გადის.
არსებული გზა დაზიანებული და ხრეშოვანი იყო, სარეაბილიტაციო პროექტის ფარგლებში, დაგეგმილია გზის საფარისა და ხელოვნური ნაგებობების რეაბილიტაცია და განახლება, ადგილობრივ გზებთან მიერთებების, ავტობუსის გასაჩერებელი მოედნებისა და მგზავრთა მოსაცდელი პავილიონების მოწყობა.
გათვალისწინებულია საავტომობილო გზის საგზაო ნიშნებით აღჭურვა, ზღუდარების მოწყობა, საგზაო ბოძკინტების დაყენება და სავალი ნაწილის მონიშვნა. გამართული საგზაო ინფრასტრუქტურა უზრუნველყოფს ტურისტებისა და ვიზიტორების უსაფრთხო და კომფორტულ გადაადგილებას.
პროექტს ინფრასტრუქტურის სამინისტროს საავტომობილო გზების დეპარტამენტი სახელმწიფო ბიუჯეტის დაფინანსებით ახორციელებს. მისი ღირებულება 18.8 მილიონი ლარია“, – წერს სოციალურ ქსელში გია აბაშიძე.
