გურამ მაჭარაშვილი: „ვინმეს შეუძლია ახსნას, რას ნიშნავს სამართლებრივად ევროკავშირში ინტეგრაციის პროცესის შეჩერება?! ან რას ნიშნავს, როცა ქართულ ჯარს ეუბნები, – 30 მილიონად იარაღს შენ აღარ გიყიდი და ლომჯარიას ვუყიდი „მოლოტოვის კოქტეილს!“

486

„ვინმეს შეუძლია ახსნას, რას ნიშნავს სამართლებრივად ევროკავშირში ინტეგრაციის პროცესის შეჩერება?! ახსნას ეს თავად ელჩმა ან ვინმემ ევროკავშირში – ასეთი რამ არ არსებობს! ან რას ნიშნავს, როცა ქართულ ჯარს ეუბნები, – 30 მილიონად იარაღს შენ აღარ გიყიდი და ლომჯარიას ვუყიდი “მოლოტოვის კოქტეილს!“ – განაცხადა ხალხის ძალის“ აღმასრულებელმა მდივანმა, დეპუტატმა გურამ მაჭარაშვილმა.

მაჭარაშვილი საქართველოს ევროინტეგრაციის შეჩერებას „გამოგონილს“ უწოდებს. დეპუტატის აზრით, ევროკავშირის ელჩის – პაველ ჰერჩინსკის განცხადება საქართველოში რადიკალიზაციის გაღვივების მიზანს ემსახურება და მან ამ განცხადებით „ოპოზიციას იარაღი გადასცა“.

„საქართველოში ევროკავშირის ელჩის განცხადება, არასწორობასთან და გაუგებრობასთან ერთად, არის ასახსნელი. ის შეურაცხმყოფელია ქართველი ხალხისთვის.

ელჩმა თქვა, რომ საქართველოს ევროკავშირში ინტეგრაცია გაჩერდა. ეს რას ნიშნავს? თეორიულად დავუშვათ, რომ საუბრობენ შეჩერებაზე. რა არის ამის არგუმენტი და რა დოკუმენტები არსებობს ამასთან დაკავშირებით?! არსებობს მსოფლიო ბანკის, სავალუტო ფონდის, არაერთი კვლევითი ორგანიზაციის დოკუმენტები, რომელთა მიხედვით, საქართველო მოწინავე ადგილზეა. ამაზე განცხადებას თავად ევროკავშირის ელჩი აკეთებს ხოლმე. საქართველო მოწინავე ადგილზეა კანდიდატ ქვეყნებს შორის და, ბევრ შემთხვევაში, ევროკავშირის წევრ ქვეყნებსაც კი უსწრებს. ამ ფონზე, ევროკავშირის ელჩს ასახსნელი აქვს, როცა მაგიდაზე დევს დოკუმენტი, რომ საქართველომ გამოცდა პირნათლად, უმაღლესი ქულებით ჩააბარა, რატომ ამბობს, რომ პროცესი შეჩერდა?! რას ნიშნავს? რა მექანიზმია ასეთი?

მეორეც – 30 მილიონთან დაკავშირებული თემა სავაჭროდ გახადეს, რაც ასევე, გაუგებართან ერთად, შეურაცხმყოფელია. ქართულმა ჯარმა მსოფლიოს მშვიდობისთვის სიცოცხლე და ჯანმრთელობა ჩადო, ნატო-ს ჯარებს ბოლომდე გვერდით დაუდგა და სამაგიეროს ამით გვიხდიან?! სამაგიეროს იმით გვიხდიან, რომ ქართულ ჯარს ეუბნებიან, – შენ აღარ გიყიდი 30 მილიონად იარაღს და ლომჯარიას „მოლოტოვის კოქტეილს“ ვუყიდი. ევროკავშირის ელჩი ამ განცხადებას აკეთებს! ასახსნელია, რას ნიშნავს, როცა ქართულ ჯარს ეუბნებიან, რომ შენ იარაღს აღარ გიყიდი, სამაგიეროდ, ლომჯარიას, გიგაურისა და „მოლოტოვის კოქტეილის“ რევოლუციურ სცენარებს დავაფინანსებ!

საქართველოსთვის კანდიდატის სტატუსის მიცემა სავაჭრო იარაღად ჰქონდათ, მაგრამ ხელისუფლებამ იმდენი გააკეთა, რომ მიხვდნენ – სტატუსი უნდა მოეცათ. ახლა სავაჭრო იარაღია მუქარა სანქციებზე, ევროკავშირში გაწევრიანების შეჩერებაზე“, – განაცხადა გურამ მაჭარაშვილმა.