“დღეს გვინდა წარმოგიდგინოთ შედეგები 474 ორგანიზაციასთან მიმართებით, რომელიც აპროტესტებდა „გამჭვირვალობის კანონის“ მიღებას”, – განაცხადა “ქართული ოცნების” დეპუტატმა, პარლამენტის განათლების, მეცნიერებისა და ახალგაზრდობის კომიტეტის თავმჯდომარემ გივი მიქანაძემ პარტიის ცენტრალურ ოფისში გამართულ ბრიფინგზე.
მიქანაძემ წარმოადგინა შვიდკომპონენტიანი საბაზისო კვლევის ანგარიში, რომელიც ეხება არასამთავრობო და მედია ორგანიზაციების გამჭვირვალობის საკითხს.
“რამდენი ორგანიზაცია ფლობს ოფიციალურ ვებგვერდს? – ჩვენ ვხედავთ, რომ 474 ორგანიზაციიდან 241 ორგანიზაციას, ანუ 51%-ს ვებგვერდი არ გააჩნია. ვებგვერდი დღეს არის კომუნიკაციის აპრობირებული საშუალება, ეს არის მთავარი საკომუნიკაციო კომპონენტი და, ასევე, ორგანიზაციის ვიზუალიზაცია, იმიჯი და ა.შ. დაკავშირებულია სწორედ ვეგბერდის გამოყენებასთან. და ჩვენ ვხედავთ, რომ 51%-ს ვებგვერდი, ელემენტარულად, არ გააჩნია და, შესაბამისად, გამჭვირვალობის კომპონენტი ფიზიკურად ვერ იქნება დაცული და ინფორმაციის მოძიება, ფაქტობრივად, შეუძლებელი ხდება.
შემდეგი კომპონენტი არის ის, თუ რამდენ ორგანიზაციას აქვს მითითებული ინფორმაცია დონორების შესახებ. ჩვენ ვხედავთ, რომ 62%-ს ანუ 474-დან 296 ორგანიზაციას არ აქვს მითითებული ინფორმაცია, თუ რომელი დონორისგან მიიღო კონკრეტული დაფინანსება.
მესამე კრიტერიუმი/კომპონენტი არის ის, თუ რამდენ ორგანიზაციას აქვს მითითებული პროექტების დასახელება. აქ იგულისხმება როგორც განხორციელებული, ისე მიმდინარე პროექტები და ჩვენ ვხედავთ, რომ 68%-ს, 474-დან 320 ორგანიზაციას არ აქვს მითითებული პროექტების დასახელება.
კიდევ უფრო რთული მდგომარეობა გვაქვს, როდესაც გრანტების ოდენობას ეხება საკითხი. ხედავთ, რომ 89%-ს, 474 ორგანიზაციიდან 422 ორგანიზაციას არ აქვს მითითებული პროექტებთან დაკავშირებული საგრანტო მოცემულობები.
შემდეგი კომპონენტია ის, თუ რამდენ ორგანიზაციას აქვს მითითებული პროექტის/გრანტის ხანგრძლივობა ანუ ვადა. ვხედავთ, რომ 378 ორგანიზაციას, ანუ 4%-ს, ყოველი ხუთიდან ოთხს ეს მითითებული არ აქვს.
გადავდივართ წლიურ ანგარიშებზე, რომელიც მნიშვნელოვანია იმისთვის, რომ ჩვენ – საზოგადოებას გვქონდეს წარმოდგენა, წლის განმავლობაში ორგანიზაციამ რა გააკეთა, რა აქტივობები განახორციელა. ვხედავთ, რომ 474 ორგანიზაციიდან 458-ს წლიური ანგარიში არ აქვს გამოქვეყნებული, და ეს არის 97% მთელი ამ ორგანიზაციების შემადგენლობისა.
ბოლო კომპონენტი: რამდენ ორგანიზაციას აქვს მითითებული ინფორმაცია გუნდის შესახებ, ანუ იმ ადამიანების შესახებ, ვინც ორგანიზაციას წარმოადგენს და კონკრეტული პროექტების განხორციელებაზე არიან პასუხისმგებელნი. აქაც ვხედავთ, რომ ძალიან მაღალია იმ ორგანიზაციების პროცენტული მაჩვენებელი, რომლებიც არ ასაჯაროებენ გუნდის წარმომადგენლობას და 70% – ეს არის 334 ორგანიზაცია 474-დან.
474 ორგანიზაციიდან მხოლოდ 8 ორგანიზაციას აქვს შვიდივე კომპონენტი დაცული. თუმცა, აქაც კიდევ ერთხელ ხაზგასმით მინდა აღვნიშნო, რომ ეს არის მხოლოდ საბაზისო ინფორმაცია იმის შესახებ, თუ ვინ არის ორგანიზაცია, რა აქტივობებს ახორციელებს, ვისგან იღებს თანხებს და რა ოდენობის თანხებს იღებს. შემდეგ, თითოეული კომპონენტის მიხედვით ქვეაქტივობების კვლევა და სიღრმისეული ანალიზი ჩვენ არ გაგვიკეთებია და ვხედავთ, თუნდაც, იმ საბაზისო დონეზე როგორი კატასტროფული მდგომარეობაა გამჭვირვალობის და საზოგადოების წინაშე ღიაობისა და ანგარიშგების კუთხით.
ეს კიდევ ერთხელ, რა თქმა უნდა, გვარწმუნებს, რომ მიღებული კანონი აუცილებელი იყო ჩვენი საზოგადოებისთვის, ჩვენი ქვეყნისთვის და ეს კანონი უზრუნველყოფს, რომ ის სექტორი, რომელიც ამ დრომდე არ იყო გამჭვირვალე, გახდეს მაქსიმალურად გამჭვირვალე, ღია და საზოგადოების ინფორმირება იყოს შესაძლებელი.
აქვე, საზოგადოებას შევახსენებ, რომ კანონი ჯერ ძალაში არ შესულა, დაახლოებით, რამდენიმე კვირაში ეს კანონი ამოქმედდება და შემდგომში უკვე შევხედავთ, პროცესები როგორ განვითარდება. თუმცა, ფაქტია, რომ ის ორგანიზაციები, რომლებიც აქამდე ეწინააღმდეგებოდნენ ამ კანონის მიღებას და ამბობდნენ, რომ ისინი, ინფორმაციის თვალსაზრისით, ხელმისაწვდომი და გამჭვირვალე არიან, რეალურად, არ არიან არც გამჭვირვალე და არც ანგარიშგებას ახდენენ საზოგადოების წინაშე.
თქვენ შეგიძლიათ, თითოეულ ორგანიზაციასთან დაკავშირებით მოცემული ინფორმაცია გადაამოწმოთ პარტია „ქართული ოცნების“ “ფეისბუკის”გვერდზე, სადაც ოთხას სამოცდათოთხმეტივე ორგანიზაციასთან მიმართებით, მათი მითითებით, შვიდივე კომპონენტზე არის წარმოდგენილი ინფორმაცია”, – განაცხადა გივი მიქანაძემ.
