თბილისის მერიამ, სპორტულ სერვისებზე ხელმისაწვდომობის გაზრდის მიზნით, კიდევ ერთი სპორტული ცენტრი ააშენა, რომელიც ლადო ასათიანის ქუჩაზე მდებარეობს.
ამასთან დაკავშირებით განცხადება თბილისის მერმა კახა კალაძემ მუნიციპალიტეტის მთავრობის დღევანდელ სხდომაზე გააკეთა.
კალაძის თქმით, ცენტრში განთავსებულია დიდი სპორტული დარბაზი კალათბურთისა და ფრენბურთისთვის, ასევე, სატრენაჟორო და ფიტნეს დარბაზები, საშხაპეები და გასახდელები.
„მოგეხსენებათ, ამ ტერიტორიაზე ადრე ფუნქციონირებდა სპორტული დარბაზი. თავდაპირველად, მის რეაბილიტაციას ვფიქრობდით, თუმცა დეტალური შესწავლის შემდეგ ვნახეთ, რომ ის რეაბილიტაციას აღარ ექვემდებარებოდა, ასევე, დიდ ხარჯებთან იყო დაკავშირებული. გადავწყვიტეთ მისი დემონტაჟი და ახალი პროექტის განხორციელება.
აღნიშნული ცენტრის მშენებლობა-აღჭურვა დასრულებულია და ვიწყებთ მსურველთა რეგისტრაციას.
პირველ ეტაპზე, რეგისტრაციის გავლა შესაძლებელი იქნება კალათბურთისა და ფიტნესის მიმართულებით, სამომავლოდ კი დაემატება ფრენბურთის მიმართულებაც“, – აღნიშნა კახა კალაძემ.
