„გვაქვს გარკვეული ცვლილებები მთავრობის შემადგენლობაში, რომელიც შეეხება საქართველოს საგარეო საქმეთა სამინისტროს, იუსტიციის სამინისტროსა და გარემოს დაცვისა და სოფლის მეურნეობის სამინისტროს“, – განაცხადა პრემიერ-მინისტრმა ირაკლი კობახიძემ მთავრობის ადმინისტრაციაში გამართულ ბრიფინგზე.
„როგორც მოგეხსენებათ, დღეს, საქართველოს პარლამენტში ნდობის გამოსაცხადებლად შედის საქართველოს მთავრობის განახლებული შემადგენლობა. გვაქვს გარკვეული ცვლილებები მთავრობის შემადგენლობაში. ეს ცვლილებები შეეხება საქართველოს საგარეო საქმეთა სამინისტროს, იუსტიციის სამინისტროსა და გარემოს დაცვისა და სოფლის მეურნეობის სამინისტროს.
ვიდრე წარდგენაზე გადავალ, მინდა, პირველ რიგში, მადლობა გადავუხადო ილია დარჩიაშვილს, რატი ბრეგაძესა და ოთარ შამუგიას მათ მიერ გაწეული საქმიანობისთვის. თითოეულმა მათგანმა ძალიან დიდი წვლილი შეიტანა იმ წარმატებაში, რომელიც ჰქონდა ჩვენს ქვეყანას გასული წლების განმავლობაში. კიდევ ერთხელ, უღრმესი მადლობა თითოეულ მათგანს გაწეული საქმიანობისთვის. ასევე მინდა მოგახსენოთ, რომ სამივე მათგანი განაგრძობს საქმიანობას მაღალ თანამდებობებზე სახელმწიფო სამსახურში, რასთან დაკავშირებითაც დეტალებს მოგვიანებით გაგაცნობთ“, – განაცხადა პრემიერმა.
საგარეო საქმეთა მინისტრის პოსტზე პრემიერმა მაკა ბოჭორიშვილის კანდიდატურა წარადგინა და აღნიშნა, რომ მაკა ბოჭორიშვილი, 20 წელიწადზე მეტი ხნის განმავლობაში, დიპლომატიურ სფეროში წარმატებით საქმიანობდა.
„წარმოგიდგენთ საგარეო საქმეთა მინისტრის კანდიდატურას, რომელიც წარედგინება საქართველოს პარლამენტს – ეს გახლავთ მაკა ბოჭორიშვილი. მას, ისევე, როგორც სხვა კანდიდატურებს, არ სჭირდება განსაკუთრებული წარდგენა, თუმცა კიდევ ერთხელ მინდა შეგახსენოთ, რომ მაკა ბოჭორიშვილს აქვს ძალიან მდიდარი გამოცდილება დიპლომატიურ სამსახურში. 20 წელიწადზე მეტი ხნის განმავლობაში ის თავის საქმიანობას ძალიან დიდი წარმატებით ახორციელებდა დიპლომატიურ სფეროში – 1999 წლიდან 2020 წლამდე. როგორც მოგეხსენებათ, 2020 წლიდან ის გახლავთ საქართველოს პარლამენტის, ჩვენი პოლიტიკური გუნდის წევრი და ევროპასთან ინტეგრაციის კომიტეტის თავმჯდომარე. მისმა საქმიანობამ ძალიან დიდი წვლილი შეიტანა ჩვენს წარმატებაში სხვადასხვა მიმართულებით. მათ შორის, ამ წლების განმავლობაში ქვეყანას ჰქონდა კონკრეტული წინსვლა ევროინტეგრაციის მიმართულებით; ქვეყანამ მიიღო კანდიდატის სტატუსი და ამაში ძალიან დიდი წვლილი მიუძღვის მაკა ბოჭორიშვილსაც.
პროფესიით მაკა ბოჭორიშვილი არის იურისტი. მას ასევე დამთავრებული აქვს დიპლომატიური აკადემია; აქვს შესაბამისი განათლება, შესაბამისი გამოცდილება, ფლობს რამდენიმე უცხო ენას, დაჯილდოებულია ღირსების ორდენით.
საგარეო საქმეთა მინისტრის პოსტზე მაკა ბოჭორიშვილის კანდიდატურა დღეს პარლამენტს წარედგინება”, – განაცხადა ირაკლი კობახიძემ.
პრემიერ-მინისტრმა იუსტიციის მინისტრის თანამდებობაზე ანრი ოხანაშვილი წარადგინა.
„ანრი ოხანაშვილს არ სჭირდება განსაკუთრებული წარდგენა – ის გახლავთ ერთ-ერთი საუკეთესო, პროფესიონალი იურისტი საქართველოში. მას აქვს მიღებული ძალიან ღრმა განათლება ჯერ თბილისის სახელმწიფო უნივერსიტეტში და შემდეგ დამთავრებული აქვს მაგისტრატურა იენის უნივერსიტეტში, გერმანიაში; ასევე, სადოქტორო დისერტაცია აქვს დაცული გერმანიაში, ჰუმბოლდტის უნივერსიტეტში. ის 2017 წლიდან გახლავთ საქართველოს პარლამენტის წევრი. წლების განმავლობაში იკავებდა იურიდიული კომიტეტის ხელმძღვანელის თანამდებობას და ყველა მიმართულებით იყო ძალიან წარმატებული თავის საქმიანობაში. ანრი ოხანაშვილი გახლავთ თბილისის სახელმწიფო უნივერსიტეტის ასოცირებული პროფესორი, არის არაერთი სამეცნიერო ნაშრომის ავტორი. დარწმუნებული ვარ, რომ ის იქნება ძალიან კარგი იუსტიციის მინისტრი. მინდა, წარმატებები ვუსურვო იუსტიციის სამინისტროში“, – განაცხადა პრემიერ-მინისტრმა.
მთავრობის მეთაურმა გარემოს დაცვისა და სოფლის მეურნეობის მინისტრად დავით სონღულაშვილი წარადგინა.
„გარემოს დაცვისა და სოფლის მეურნეობის მინისტრად მინდა, წარმოგიდგინოთ დავით სონღულაშვილის კანდიდატურა. მასაც არ სჭირდება განსაკუთრებული წარდგენა. დავით სონღულაშვილს აქვს ღრმა განათლება შესაბამის სფეროში – ბიზნესის, ეკონომიკის მიმართულებით. მას დამთავრებული აქვს კავკასიის ბიზნეს სკოლა და გრენობლის ბიზნესის უმაღლესი სკოლა. ის არის საერთაშორისო ბიზნესის მაგისტრი, გახლავთ საქართველოს პარლამენტის წევრი, უკვე მრავალი წელია. სხვადასხვა დროს იყო სხვადასხვა კომიტეტის თავმჯდომარე, მათ შორის, ევროინტეგრაციის კომიტეტის. ის იყო დარგობრივი ეკონომიკისა და ეკონომიკური პოლიტიკის კომიტეტის თავმჯდომარე. მანამდე ძალიან წარმატებულ საქმიანობას ეწეოდა ასევე კერძო სექტორსა და სახელმწიფო სამსახურში.
დავით სონღულაშვილი არის პროფესიონალი და, დარწმუნებული ვართ, რომ ის იქნება არაჩვეულებრივი მინისტრი გარემოს დაცვისა და სოფლის მეურნეობის სფეროში”, – განაცხადა პრემიერ-მინისტრმა.
ირაკლი კობახიძემ წარდგენილ კანდიდატებს წარმატებები უსურვა.
„დარწმუნებული ვარ, რომ მათი ხელმძღვანელობით ჩვენ გვექნება ძალიან დიდი წარმატება ყველა მიმართულებით და ქვეყანას ექნება წინსვლა კონკრეტულად იმ მიმართულებებით, რომლებსაც უხელმძღვანელებენ ჩვენ მიერ წარმოდგენილი კანდიდატები.
კიდევ ერთხელ, მადლობას გადავუხდი ილია დარჩიაშვილს, რატი ბრეგაძესა და ოთარ შამუგიას. მინდა, კიდევ ერთხელ, წარმატებები ვუსურვო სამივე კანდიდატს”, – აღნიშნა პრემიერმა.
