უკრაინის უმაღლესმა რადამ ვერ დაამტკიცა რეზოლუციის პროექტი, რომელიც ვოლოდიმირ ზელენსკის საპრეზიდენტო მანდატის მხარდაჭერას ეხებოდა. ინფორმაციას უკრაინული მედია ავრცელებს.

რეზოლუციას მხარი 218-მა დეპუტატმა დაუჭირა. მის დასამტკიცებლად დეპუტატთა 226 ხმა იყო საჭირო.

„უკრაინის პრეზიდენტმა ვოლოდიმირ ზელენსკიმ უნდა გააგრძელოს თავისი მოვალეობების შესრულება, სანამ, უკრაინის კონსტიტუციის 108-ე მუხლის პირველი ნაწილის შესაბამისად, პოსტს უკრაინის ახალი პრეზიდენტი არ დაიკავებს“, – ეწერა რეზოლუციის ტექსტში.

განცხადებაში, რომელიც პარლამენტს უნდა მიეღო, აგრეთვე აღნიშნულია, რომ ზელენსკის მანდატი უკრაინელი ხალხისა და უმაღლესი რადას მიერ ეჭვგარეშედაა მიჩნეული.

დოკუმენტში ასევე წერია, რომ ვლადიმერ პუტინია პასუხისმგებელი იმაზე, რომ დღეს უკრაინაში შეუძლებელია თავისუფალი, გამჭვირვალე და დემოკრატიული არჩევნების ორგანიზება საერთაშორისო დამკვირვებლების მოწვევით, რომლებსაც საერთაშორისო თანამეგობრობა აღიარებდა.