გარემოს დაცვისა და სოფლის მეურნეობის სამინისტროს მხარდაჭერითა და სოფლის განვითარების სააგენტოს ორგანიზებით, იაპონიაში, ქ. ტოკიოში გამართულ საერთაშორისო გამოფენა „FoodexJapan 2025-ში“ ექვსმა ქართულმა კომპანიამ მიიღო მონაწილეობა.
გარემოს დაცვისა და სოფლის მეურნეობის სამინისტროს ინფორმაციით, გამოფენის გახსნას სოფლის განვითარების სააგენტოს დირექტორის მოვალეობის შემსრულებელი გიორგი ფანცულაია და საქართველოს საგანგებო და სრულუფლებიანი ელჩი იაპონიაში თეიმურაზ ლეჟავა დაესწრნენ.
გიორგი ფანცულაიას განცხადებით, საერთაშორისო გამოფენებში მონაწილეობის მიღება მნიშვნელოვნად უწყობს ხელს ქართველ მეწარმეებს, აწარმოონ უფრო მეტი ხარისხიანი და კონკურენტუნარიანი პროდუქცია, მოახდინონ ბაზრების დივერსიფიცირება და გაზარდონ საკუთარი საექსპორტო შესაძლებლობები.
ქართულ პავილიონში წარმოდგენილი იყო კომპანიების: „აქუა გეოს“,„კულას“, „ჯეონატურალსის“, „აგროლეინის“, „აგროლაინისა“ და „ჯეოფლაუერსის“ სტენდები.
გამოფენის ვიზიტორებს საშუალება ჰქონდათ, გასცნობოდნენ ქართული კომპანიების მიერ წარმოებულ პროდუქციას: ლურჯ მოცვს, კაკალს, თაფლს, წყალს, წვენებს, ჯემებსა და კომპოტებს.
აღსანიშნავია, რომ ქართულმა კომპანიებმა გამოფენის მონაწილეებისა და ვიზიტორების ინტერესი დაიმსახურეს. როგორც კომპანიების წარმომადგენლები აღნიშნავენ, გამოფენაში მონაწილეობის შემდეგ კარგი თანამშრომლობის მოლოდინი აქვთ.
„FoodexJapan“ აზიაში ერთ-ერთი ყველაზე დიდი საერთაშორისო გამოფენაა. მიმდინარე წელს, რიგით 50-ე საიუბილეო გამოფენას 70,000-ზე მეტი ვიზიტორი ეწვია.
გამოფენაში მონაწილეობა მიიღო 2900 კომპანიამ 70 ქვეყნიდან. „FoodexJapan 2025“ 11-14 მარტს გაიმართა.
