პარლამენტის ვიცე-სპიკერი, პარტია „ხალხის ძალის“ თავმჯდომარე სოზარ სუბარი აშშ-ის გენერალური პროკურორის, პემ ბონდის განცხადებას ეხმაურება, რომელშიც მან “მოლოტოვის კოქტეილის” სროლა შიდა ტერორიზმად შეაფასა.
„აბსოლუტურად ვეთანხმები აშშ-ის გენერალურ პროკურორს, იმიტომ, რომ თავდასხმა პოლიციელებზე, სახელმწიფო დაწესებულებებზე, ცოცხალი ადამიანებისთვის ცეცხლის წაკიდება შეუძლებელია სხვანაირად შეფასდეს, თუ არა ტერორიზმად და, ბუნებრივია, ასე უნდა მივუდგეთ ჩვენც.
ამის ფონზე, კიდევ უფრო სამარცხვინოა საქართველოს ყოფილი პრეზიდენტის ქმედება, რომელმაც შეიწყალა ლაზარე გრიგორიადისი – ადამიანი, რომელიც პოლიციელებს ცეცხლს უკიდებდა და მათ ცოცხლად დაწვას ცდილობდა.
კიდევ უფრო სამარცხვინოა ორმაგი სტანდარტი ევროკავშირისა, რომელიც აფინანსებდა კამპანიას – „მე ვარ ლაზარე გრიგორიადისი“ და ამით ახდენდა “მოლოტოვის კოქტეილის” სროლის ჰეროიზაციას. კამპანიის მეორე ნაწილი იყო – „მე ვისროლე მოლოტოვის კოქტეილი“.
ეს არის სამარცხვინო და ორმაგი სტანდარტი”, – განაცხადა სოზარ სუბარმა.
