“პირდაპირ ეთერში მიდიოდა გადაცემა, რა წარმატებებს აღწევს ქართული ჯარი; დავიბრუნეთ ეს სოფელი, ის სოფელი, დასახლებული პუნქტი, ის სიმაღლე ავიღეთ… მოსახლეობა, რაღაცნაირად, იმედიანად იყო, მაშინ ყველას არ ჰქონდა მობილური ტელეფონი, ინფორმაცია, კავშირები მაშინ ასე არ იყო. ამ კავშირების ჩახშობა მიდიოდა და მოსახლეობა იყო მშვიდად, როცა ტელევიზორს უყურებდა”, – განაცხადა პარლამენტის დროებითი საგამოძიებო კომისიის მდივანმა სოზარ სუბარმა 2003-2012 წლებში მოქმედი რეჟიმის საქმიანობის შემსწავლელი დროებითი საგამოძიებო კომისიის სხდომაზე.
„ეგ ერთი პრობლემაა, რამაც გამოიწვია მოსახლეობაში მსხვერპლი, და მეორე – ეს სატელევიზიო გადაცემები, პირდაპირი ეთერები უშიშროების საბჭოში, რაღაცნაირად, ხომ არ ყოფილა განხილული კომისიაზე? ხომ არ იყო ეს რაღაცნაირი ნიშანი იმისა, რომ პირდაპირ ვეუბნებოდით მტერს, რას ვაკეთებდით, სად იყო განლაგებული ჯარი, რას ვბომბავდით, საით მივდიოდით? ანუ, მოწინააღმდეგისთვის საიდუმლო ინფორმაციის გადაცემა ხდებოდა პირდაპირ ეთერში.
ერთ ფაქტს გავიხსენებ, რომელიც განსაკუთრებით კარგად მახსოვს, რადგან 31-ე ქარხანასთან ვცხოვრობდი, უშუალოდ ქარხნის წინ მქონდა ბინა და ერთი რუსული თვითმფრინავი შემოფრინდა, რომელმაც ერთი ბომბი ისროლა და ეს ბომბი ესროლა საავიაციო ქარხნის ასაფრენ ზოლს. მას თავისი ზოლი აქვს. გამოვიდა, რამდენადაც მახსოვს, კახა (ალექსანდრე) ლომაია – უშიშროების საბჭოს მდივანი იყო მაშინ და პირდაპირ ეთერში დასცინა რუსებს, – სამიზნეები არ უვარგათ 20 მეტრი მარჯვნივ თუ მარცხნივ ააცილესო და შემოფრინდა ნახევარ საათში თვითმფრინავი, შესაბამისად, დაარტყა მარცხნივ ან მარჯვნივ 20 მეტრით. ისიც გვახსოვს, რომ შოთა უტიაშვილს რუკები ჰქონდა გამოფენილი და პირდაპირ რუკაზე აჩვენებდა, სად ვიყავით, რას ვაპირებდით და სამომავლო გეგმები – ყველაფერი იყო განხილული”, – განაცხადა სუბარმა.
სუბარმა დამაზუსტებელი კითხვით მიმართა პაატა დავითაიას, რომელიც 2008 წელს პარლამენტში შექმნილი დროებით კომისიის ხელმძღვანელი იყო, – განიხილეს თუ არა კომისიის სხდომაზე მოწინააღმდეგის ცეცხლის პირდაპირი კორექტირება, „ნავოტკების“ მიცემა და მისი, როგორც კომისიის ხელმძღვანელის აზრით, არის თუ არა პირდაპირ ეთერში აღნიშნული ინფორმაციის გავრცელება დასჯადი.
ამ შეკითხვაზე დავითაიამ უპასუხა:
„აღსანიშნავია, რომ ქვეყანაში არსებობდა ნორმატიული აქტი – საქართველოს მთავრობის დადგენილება „საგანგებო მდგომარეობის დროს სპეციალური სამთავრობო კომისიის შექმნის შესახებ“, რომელიც განსაზღვრავს საომარ და საგანგებო სიტუაციებში მთავრობის წევრთა ფუნქციებსა და მოქმედებებს. ასეთი ტიპის კომისია აგვისტოს მოვლენებთან დაკავშირებით არ შექმნილა. ამან გამოიწვია მთავრობის წევრთა არაკოორდინირებული მოქმედება, რაც პირდაპირ წერია კომისიის დასკვნაში. დადგენილება იყო, მაგრამ დადგენილებით უნდა შექმნილიყო კომისია ომამდე, რომელიც დაარეგულირებდა კონკრეტულად იმ საკითხებს, რაც თქვენ წამოჭერით. კანონმდებელმა მაშინ განსაზღვრა ის, რომ მთავრობის დადგენილება მიიღო. ნორმატიული აქტის შესრულება ომამდე ვერ მოახდინა. ამას ჩვენ მივაკვლიეთ და ჩავთვალეთ ომის დროს საქართველოს ხელისუფლების ხარვეზებად”.
სოზარ სუბარმა შეაჯამა პაატა დავითაის ნაამბობი და განაცხადა, რომ, როდესაც აღნიშნულ ქმედებას სახელმწიფო მოხელე, უშიშროების საბჭოს მდივანი, ან შსს-ს ანალიტიკური სამსახურის ხელმძღვანელი თუ მოადგილე ახორციელებს, ნამდვილად შეიცავს დანაშაულის ნიშნებს.
„პრაქტიკულად, დაადასტურეთ, რომ ერთია, როცა შეცდომას ჟურნალისტი უშვებს, მაგრამ როცა ამას სახელმწიფო მოხელე (უშიშროების საბჭოს მდივანი თუ შსს-ს ანალიტიკური სამსახურის ხელმძღვანელი თუ მოადგილე) აკეთებს, ამას, არ ვიცი, შეიძლება, ღალატი ჰქვია, მაგრამ ეს დანაშაულის ნიშნებს ნამდვილად შეიცავს”, – განაცხადა სოზარ სუბარმა.
პაატა დავითაიას განცხადებით, აღნიშნული დადასტურებულია 2008 წლის 16 დეკემბრის დასკვნის გამოცხადების შემდეგ.
