“მათ უნდათ, რომ საქართველოს არანაირი დამოუკიდებლობის ხარისხი არ ჰქონდეს, მათ შორის, გადაწყვეტილებებში. როდესაც ფინანსურ სტაბილურობაზე, ეკონომიკურ წინსვლაზე ზრუნავს სახელმწიფო თავისი სხვადასხვა ინსტიტუტის მეშვეობით (ეს ეროვნული ბანკი იქნება, ეკონომიკის სამინისტრო თუ სხვა), გადამწყვეტი ფაქტორი არის ქვეყნის დამოუკიდებლობაში”, – ასე უპასუხა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ ჟურნალისტის შეკითხვას იმასთან დაკავშირებით, თუ რატომ ეწინააღმდეგებიან ოპონენტები საქართველოს ჩინეთთან სტრატეგიულ პარტნიორობასა და ეროვნული ბანკის პრეზიდენტის ვიზიტს ჩინეთში.
„უნდა შეგეძლოს, რომ შენი შეხედულებებისამებრ გადაწყვიტო შენი ქვეყნის დამოუკიდებლობა, სუვერენიტეტი, ეკონომიკური სიძლიერე; სწორად გადაჭრა ბევრი საკითხი, რაც შენს ეროვნულ ინტერესებშია და არა სხვის ეროვნულ ინტერესებში. შენს ქართულ, ეროვნულ ინტერესებში რაც ჯდება, ეს საკითხები შენვე რომ გადაწყვიტო, ამის წინააღმდეგ მიდიან. ქუდი მათი გადაწყვეტილებებისა, მთავარი, პირამიდის წვერი წარმოიდგინეთ – აი, ამ წვერზე არის მთავარი მიზანი, რომ საქართველო არ უნდა იყოს დამოუკიდებელი და მან დამოუკიდებლად გადაწყვეტილებები არ უნდა მიიღოს. მათ ამ მიზანს აქვს ქვემიზნები და ერთ-ერთ ქვემიზანში ჯდება ის, რომ არ უნდა იყოს მიღებული გადაწყვეტილება, პარტნიორობა შეძლო ჩინეთთან, ეკონომიკურად ასეთ ძლიერ ქვეყანასთან; ვერ უნდა მოახდინო შენი ეკონომიკური მიზნების, გეგმების დივერსიფიკაცია, რომ ყველა მიმართულებით გქონდეს ეკონომიკური უსაფრთხოების და ზოგადად, უსაფრთხოების მყარი გარანტიები.
უსაფრთხოებისა და ეკონომიკის საკითხები მყარად არის ერთმანეთთან გადაჯაჭვული, მათ შორის, ეკონომიკის უსაფრთხოების. როდესაც ამ საკითხებზე ზრუნავს დამოუკიდებელი სახელმწიფო, ისეთი პატარა ქვეყანა, როგორიც საქართველოა, მათ ეს აშინებთ, ანაღვლებთ მხოლოდ და მხოლოდ იმის გამო, რომ, როგორც კი შენ აქ გაიმყარებ პოზიციებს, გარედან დავალებების შესრულების შანსი მცირდება. ეს აწუხებთ, ამიტომ აქვთ პირდაპირი მითითება, რომ ამასთან დაკავშირებით დარტყმები მიაყენონ საკუთარ ქვეყანას”, – განაცხადა მამუკა მდინარაძემ.
