პარლამენტმა მესამე მოსმენით დაამტკიცა „მაუწყებლობის შესახებ“ კანონში მომზადებული ცვლილებები, რომლის მიხედვით, ტელე- და რადიო მაუწყებლებთან დაკავშირებით ახალი რეგულაციები, მოთხოვნები და სტანდარტები შემოდის.
დღევანდელ პლენარულ სხდომაზე ცვლილებებს მხარი დაუჭირა 85-მა დეპუტატმა.
პარლამენტის გადაწყვეტილებით, თვითრეგულირების მექანიზმებთან ერთად, მაუწყებლობის სტანდარტების დარღვევაზე რეაგირების უფლებამოსილება სახელმწიფო ორგანოს – კომუნიკაციების ეროვნულ კომისიას ექნება.
კანონის სავარაუდო დარღვევასთან დაკავშირებით, დაინტერესებულ პირს საჩივრით პირდაპირ კომუნიკაციების კომისიისთვის მიმართვის შესაძლებლობა ეძლევა. დარღვევის დადგენის შემთხვევაში კი, კომისია უფლებამოსილი იქნება, გამოიყენოს მაუწყებელს მიმართ შემდეგი სანქციები – გაფრთხილება, ჯარიმა და, გარკვეულ შემთხვევებში, ლიცენზიის შეჩერება და გაუქმება.
კანონით დადგენილი წესები და რეგულაციები მაუწყებელთა ონლაინ და სოციალურ გვერდებზე გამოქვეყნებულ ინფორმაციაზეც გავრცელდება.
მიღებული გადაწყვეტილებით, მაუწყებლის მიერ კანონით გათვალისწინებული მოთხოვნების 2025 წლის 1-ელ ივნისამდე დარღვევის შემთხვევაში, მარეგულირებელი კომისიის მიერ დაწესებული სანქციების აღსრულება არ მოხდება.
