პარტია „ხალხის ძალის“ წევრი დავით ქართველიშვილი ინფორმაციას იმის შესახებ, რომ ევროპის ჩემპიონატის ქვეჯგუფიდან გასვლისთვის ფონდი „ქართუ“ საფეხბურთო ნაკრებს, ჯილდოს სახით, 30 მილიონ ლარს გადასცემს, ქვეჯგუფიდან გასვლის შემდეგ, ყოველი შემდეგი მატჩის მოგებისთვის კი ეროვნულ ნაკრებს დამატებით 30 მილიონი ლარით დააჯილდოებს, სოციალურ ქსელში გამოეხმაურა.
„ისეთ შთაბეჭდილებას ტოვებენ ეს უსამშობლო მანქურთები, თითქოს ამ წამს, ახლა, ფონდი “ქართუ” რაღაც “ლოიალობის” შეძენის საფასურად ქართველი ფეხბურთელების “პოლიტიკურ” მოსყიდვას ცდილობს. მე მგონი, ილიას ტრიადიდან, სარწმუნოების შემდეგ, ენაც ამოვარდნილია. ან ვეღარ კითხულობენ, ან წაკითხულიდან ელემენტარული აზრის გამოტანა უჭირთ.
ახლა არაო!!! აქციის მიმდინარეობისას – არაო!!! ქვეჯგუფიდან თუ გავლენ – მაშინო!!! თანაც, ფეხბურთისთვის რა სიმბოლური ფულადი პრიზია: 11 მილიონი ევრო (ეკვივალენტით ლარებში), და ასეთივე თანხა ფლეი-ოფში გასვლისას თითოეული მოგებული თამაშისთვის!
პოლიტიკური შიზოფრენიით შეპყრობილებს გამოსავლის სახით ვჩუქნი ორ ალტერნატიულ ვარიანტს:
პროტესტის ნიშნად, ნაკრებმა შეიძლება წააგოს ჯგუფში ყველა თამაში, სპეციალურად, რომ აირიდოს ეს “სამარცხვინო” ფულადი ჯილდო,
ან “ჯონ ლენონის” გზას დაადგეს, რომელმაც ჯერ მიიღო ბრიტანეთის დედოფლის ხელიდან საპატიო ორდენი, ხოლო შემდეგ, ვიეტნამის ომის მხარდაჭერის გაპროტესტების გამო, დააბრუნა იგი.
მე კი ვუსურვებ ჩვენს ფეხბურთელებს მოგებას, ხოლო რა გამოყენებას მოუძებნიან ისინი დამსახურებულ ფულად ბონუსებს, თავად გადაწყვიტონ. იმის დასტურად, რომ საფეხბურთო ნაკრებების კერძო ფონდების მხრიდან ფულადი წახალისება მიღებული საერთაშორისო პრაქტიკაა, ამ პოსტს საინტერესო “ქარდებსაც” მივაყოლებ“, – წერს დავით ქართველიშვილი „ფეისბუკის“ გვერდზე.
