ე.წ. თაღლითური ქოლცენტრების საქმეზე ბრალდებულ ხუთივე პირს თბილისის საქალაქო სასამართლომ, აღკვეთის ღონისძიების სახით, პატიმრობა შეუფარდა.
მოსამართლემ პროკურატურის შუამდგომლობა – აღკვეთის ღონისძიებად პატიმრობა დააკმაყოფილა.
ბრალდებული ხუთი პირიდან სამი დაკავებულია, ორი კი მიმალვაში იმყოფება. კერძოდ, მიმალვაში არიან ელდარ ბინიაშვილი და დავით თოდუა, რომლებიც, პროკურატურის ინფორმაციით, ქოლცენტრის არაოფიციალური მეწილეები და მმართველები იყვნენ.
წინასასამართლო სხდომა აღნიშნულ საქმეზე 31 ოქტომბერს ჩაინიშნა.
პროკურატურის მტკიცებით, „მორგან ლიმიტედის“ სახელით მოქმედი თაღლითური ქოლცენტრის ერთ-ერთ ხელმძღვანელს დავით კეზერაშვილთან, მის დასა და დისშვილთან მილიონ დოლარზე მეტი აქვს გადარიცხული იმ პერიოდში, როდესაც კომპანია ევროპული ქვეყნების მოქალაქეების თანხებს თაღლითურად ეუფლებოდა.
ამავე საქმეზე სამართალდამცველებმა ორი კვირის წინ ექვსი ფიზიკური და ერთი იურიდიული პირი მისცეს პასუხისგებაში. საგამოძიებო უწყების ცნობით, დაზარალებულები გერმანიის, სლოვაკეთისა და სლოვენიის მოქალაქეები არიან. პროკურატურის ინფორმაციით, ევროპის ქვეყნების მოქალაქეებმა 3 170 000 ევროს ზიანი მიიღეს.
