საქართველოს პარლამენტის ევროპასთან ინტეგრაციის კომიტეტის თავმჯდომარე მაკა ბოჭორიშვილი დუბლინში, ევროპის საპარლამენტო ასამბლეის შემოდგომის სხდომაზე სიტყვით გამოვიდა.
“ძვირფასო კოლეგებო,
ამ ორგანიზაციის ფუნდამენტური მიზანი ევროპაში უსაფრთხოების და თანამშრომლობის უზრუნველყოფაა, თუმცა ჩვენ გამუდმებით გვიწევს კონფლიქტებზე საუბარი.
საქართველო ეუთო-ს მონაწილე ის ქვეყანაა, რომელიც ათწლეულებია საკუთარ თავზე განიცდის საერთშორისო ნორმების უგულვებელყოფის შედეგებს.
კონფლიქტი, ტერიტორიული მთლიანობის ხელყოფა, საქართველოს ორი რეგიონის რუსეთის მიერ ოკუპაცია და იქ მისი სამხედრო ბაზები, ეს არის ის გამოწვევები, რომლის წინაშეც ჩემი ქვეყანა უკვე 3 ათწლეულია დგას.
საქართველოს ხელისუფლების გაცხადებული პოლიტიკა არის კონფლიქტის მოგვარების მშვიდობიანი გზების ძიება და საქართველოს ტერიტორიული მთლიანობის მშვიდობიანი გზით აღდგენა.
ამ პროცესში ბევრი საერთაშორისო აქტორი ჩართულია, ეუთოს ჩათვლით, თუმცა ამ დრომდე ჟენევის საერთაშორისო მოლაპარაკებების წარმატებაზე საუბარი ძალიან რთულია.
საქართველოს ხელისუფლების 10 წლიანი ძალისხმევის შედეგად დღეს ჩვენ საერთაშორისო სასამართლოების გადაწყვეტილებებიც გვიმაგრებს ზურგს და არა მხოლოდ პოლიტიკური, არამედ სამართლებრივი არგუმენტებით შეგვიძლია ვიბრძოლოთ მშვიდობიანი გზით კონფლიქტის მოგვარებისთვის.
რუკაზე ერთი დახედვაც კი საკმარისია, რომ მიხვდე, რამდენად კომპლექსურ გარემოში გვიწევს დღეს მშვიდობის შენარჩუენებასა და ქვეყნის დემოკრატიული განვითარების სტაბილური გზის უზრუნველყოფაზე ზრუნვა.
უკანასკნელ წლებში საქართველო სხვადასხვა მიზეზით არაერთხელ დადგა დესტაბილიზაციის საფრთხის ქვეშ, რაც კიდევ უფრო მეტად მოწყვლადს ხდის ქვეყანის უსაფრთხოებას.
ვიხილეთ არა ერთი საერთაშორისო მასშტაბის კამპანია, რომელიც უმეტესწილად მოკლებულია რეალურ ობიექტურ საფუძვლებს, თუმცა ქვეყნის რეპუტაციას ლახავს.
წინ მნიშნველოვანი საპარლამენტო არჩევნებია.
ხელისუფლების ინტერესშია, ქვეყანაში არჩევნები წესების დაცვით ჩატარდეს და საქართველოს მოქალაქეების არჩევანი კითხვის ნიშნის ქვეშ არავინ დააყენოს, როგორც ეს წარსულში მომხდარა.
საქართველოს ხელისუფლების მოწვევით თქვენ შესაძლებლობა გექნებათ დააკვირდეთ არჩევნებს და გააკეთოთ ობიექტური დასკვნები.
თქვენი მისია იმაზე მეტია ვიდრე მხოლოდ არჩევნებზე დაკვირვებაა.
დღეს საქართველოში სტაბილურობის და მშვიდობის შენარჩუნება არა მხოლოდ ჩვენთვის არის მნიშნველოვანი არამედ მთელი რეგიონის უსაფრთხოებისთვის”,- განაცხადა ბოჭორიშვილმა.
