“ვიზიტს რაც შეეხება, ზოგადად, კომუნიკაცია მნიშვნელოვანია. ჩვენ ყოველთვის ღია ვართ და არასდროს დაგვიხურავს კარი ვინმესთვის, პირიქით, – ყოველთვის ვამბობთ, რომ ჯანსაღი ურთიერთობები და არსებული სიტუაციის გაჯანსაღება არის ძალიან მნიშვნელოვანი”, – განაცხადა “ქართული ოცნების” გენერალურმა მდივანმა კახა კალაძემ ევროსაბჭოს გენერალური მდივნის, ალენ ბერსეს საქართველოში ვიზიტთან დაკავშირებით.
კახა კალაძე ევროსაბჭოს გენერალური მდივნის მიერ უცხოური გავლენის გამჭვირვალობის შესახებ კანონში ცვლილებების შესაძლო შეტანასთან დაკავშირებით გაკეთებულ განცხადებას გამოეხმაურა და აღნიშნულ კანონზე დისკუსიისა და მასში ცვლილებების შეტანის მიმართულებით თანამშრომლობის მზადყოფნა გამოხატა.
“რაც შეეხება გამჭვირვალობის კანონს, ჩვენ არაერთხელ გვითქვამს და კიდევ გავიმეორებ: ვინმე გამოჩნდეს, რომელიც იტყვის, რა არის აღნიშნულ კანონმდებლობაში პრობლემა. მაშინაც ვამბობდით და ახლაც იმავეს ვიმეორებთ – გამოთქვით კონკრეტული მოსაზრებები და მიუთითეთ, თუ რა არის პრობლემა აღნიშნულ კანონმდებლობასთან დაკავშირებით, რა ეწინააღმდეგება ევროპულ მომავალს და რას შეუქმნის აღნიშნული კანონი საფრთხეს. ჩვენ ამაზე არანაირი პასუხი არ მიგვიღია და იგი დღესაც არ არსებობს. უბრალოდ, მოიფიქრეს რაღაც პიარული სისულელე, რომ ეს არის რაღაც რუსული კანონი. არადა, ნახეთ, საფრანგეთმა ამაზე მძიმე კანონი მიიღო. იმაზეც მზად ვართ, რომ ანალოგიური გადმოვიტანოთ, რაც საფრანგეთმა მიიღო და რომელიც გაცილებით მძიმეა, ვიდრე ჩვენ მიერ მიღებული გამჭვირვალობის კანონი. ასე რომ, თუკი რაიმე არსებობს, კონკრეტული, თუ რა შეიძლება შეიცვალოს, მზად ვართ თანამშრომლობისთვის, ოღონდ ვინმემ თქვას. ამასთან დაკავშირებით არც ჩვენ, არც საზოგადოებას არ მოუსმენია არგუმენტი. ერთადერთი პასუხი ჰქონდა სალომე ზურაბიშვილს – “იმიტომ”. მეტი არაფერი მოგვისმენია“, – განაცხადა კახა კალაძემ.
