„მაშინ, როდესაც „ნაციონალური მოძრაობის“ ორეულის – პარტია „ლელოს“ თავმჯდომარე მამუკა ხაზარაძე ბოლშევიკურ განცხადებებს აკეთებს, ჩვენ რეფორმებზე ვმუშაობთ“, – განაცხადა პარლამენტის განათლების, მეცნიერებისა და ახალგაზრდობის კომიტეტის თავმჯდომარის პირველმა მოადგილემ გიორგი ჩაკვეტაძემ პლენარულ სხდომაზე.
როგორც ჩაკვეტაძემ აღნიშნა, „ფაქტია, რომ „ლელოს“ დაკარგული აქვს რეალობის აღქმა“.
„ჯერ უკვე მიღებულ სტაჟირების კანონს თავიდან დაგვპირდნენ, შემდეგ ცეცხლოვანი მუსტანგით მოსახლეობის კეთილგანწყობის მოპოვება სცადეს, და ბოლოს, გადასახლებითაც დაგვემუქრნენ. ე.წ. გაციმბირება შემოგვთავაზეს, როგორც გამოსკოვება და, როგორც აღმოჩნდა, ოპოზიციის ერთ-ერთი წარმომადგენელი არის კომკავშირის „ტრადიციების“ მიმდევარი. ამ პარტიებისგან გასაკვირი არაფერია და წინასაარჩევნოდ უფრო კომიკურ სიუჟეტებსაც ველოდებით, მაგრამ ჩვენ ვხედავთ, რომ მათ აზროვნებაზე კომუნისტურმა წყობამ წარუშლელი კვალი დატოვა. მათ მოახერხეს საბჭოთა დიქტატის „რესტაილინგი“ და ახალი ტიპის გაციმბირება შემოგვთავაზეს“, – აღნიშნა ჩაკვეტაძემ.
