„ჩემთვის თვალშისაცემი და გასახარი იყო ის, რომ „ხალხის ძალის“ პარტიად დარეგისტრირებისას, ყრილობაზე, დარბაზში ახალგაზრდები მრავლად იყვნენ წარმოდგენილნი. გულწრფელი უნდა ვიყო – არ ველოდი ასეთ შედეგს“, – განაცხადა პოლიტიკური პარტია „ხალხის ძალის“ გენერალურმა მდივანმა, დეპუტატმა დიმიტრი ხუნდაძემ.
დიმიტრი ხუნდაძემ ისაუბრა „ხალხის ძალის“, როგორც მოძრაობის, უკვე მიღწეულ შედეგებსა და აწ უკვე როგორც პარტიის – მიზნებზე.
„თავიდან, საზოგადოებაში „ხალხის ძალასთან“ დაკავშირებით თითქოს გარკვეული სტიგმა შეიქმნა – ბევრი მომხრეც კი ერიდებოდა ჩვენთან ურთიერთობას. დღეს საზოგადოებაში რომ გავდივართ, დამოკიდებულება რადიკალურად დადებითისკენ არის შეცვლილი.
საზოგადოებამ „ხალხის ძალის“ გავლენით დაიწყო უკვე მსჯელობა და შეწყვიტა მორჩილი დამოკიდებულება ყველაფერი იმისადმი, რაც უცხოეთიდან მოდის, მხოლოდ იმიტომ, რომ „ის დასავლეთია“. მანამდე თუ, უტრირებულად რომ ვთქვათ, ვიღაც იტყოდა – „ლგბტ პროპაგანდა თუ დასავლეთიდან მოდის, კარგია, მაგრამ ჩრდილოეთიდან რომ მოდიოდეს, ცუდი იქნებოდაო“, დღეს უკვე მსჯელობენ ყველაფერზე, მათ შორის, დასავლეთთან მიმართებით. ეს არის ჩვენი ძირითადი მიღწევა. მაგრამ, წინ დიდი გზაა. ამ დიდი გზის გასავლელად კი მზად ვართ.
ვინმე თუ ფიქრობს, რომ ჩვენ საარჩევნო ბარიერის გადალახვაზე ვზრუნავთ, ან, უბრალოდ, ვტრაბახობთ, პირდაპირ ვეტყვი, რომ ძალიან ცდება. პოლიტიკურ პროცესებში „ხალხის ძალა“ ერთ-ერთი აქტიური სუბიექტი იქნება. საზოგადოებასთან ყველაზე ახლოს მდგომი „ხალხის ძალაა“. ძალა ხალხშია და ეს ყველამ უნდა იცოდეს. ამიტომ, „ხალხის ძალა“ ხალხთან ყველაზე ახლოს არის და იქნება და ყველაზე მეტი ძალა ექნება ხალხსა და „ხალხის ძალას“ ერთად აღებულს“, – განაცხადა დიმიტრი ხუნდაძემ.
