საზოგადოებრივი მოძრაობა „საქართველო უპირველეს ყოვლისას“ დამფუძნებელი ვატო შაქარიშვილი სოციალურ ქსელ “ფეისბუკში” მოსკოვის ოლქის ქალაქ კრასნოგორსკში, „კროკუს სითი ჰოლის“ საკონცერტო დარბაზში მომხდარი ტერაქტის შესახებ გაკეთებულ შეფასებებსა და განცხადებებს ეხმაურება.
“მოსკოვში მომხდარმა შემზარავმა ტერორისტულმა აქტმა, კიდევ ერთხელ წარმოაჩინა დასავლეთში გამეფებული ფარისევლობის მასშტაბი, რომელიც უკვე ფაშიზმში გადაიზარდა!
არ იქნება არც Je suis Charlie, არც სოლიდარობის და სამძიმრის სიტყვები… მაშინ, როცა მინიმუმ 60 უდანაშაულო ადამიანი, ქალი, კაცი, ბავშვი ტერორისტებმა უმწეო მდგომარეობაში სასტიკად მოკლეს…
გადავხედე ბორელის, მიშელის, ფონ დერ ლაიენის და სხვების ოფიციალურ გვერდებს – დუმილი… ეტყობა, ბორელისეული “აყვავებული ბაღის” ბინადრები რომ არ იყვნენ ეს ადამიანები, მათზე არ ვრცელდება სიცოცხლის უფლება, ტერორისტების მიერ უსასტიკესი ფორმებით მათი დახოცვაც კი, არ იწვევს ემპათიის განცდას…
უფრო შორს წავიდნენ ქართველი ფაშისტები, რომლებიც საკუთარ თავს ლიბერალებს უწოდებენ. რომ კითხო, ყოველგვარ ძალადობას ემიჯნებიან და ჰუმანურობის უმღლეს მწვერვალზე არიან… გამოდგნენ და წარმოუდგენელ რაღაცებს წერენ და ამბობენ… ჯერ კიდევ არაფერი იყო დასრულებული და ტვ პირველზე “სამხედრო ანალიტიკოსები” გამოიყვანეს, რომლებიც ერთმანეთზე უარეს სისულელეებს ლაპარაკობდნენ.
დილიდან, საქართველოს მთავრობის სამძიმრის წერილს შეესივნენ და ფბ. ტერმინს გამოვიყენებ – აჰაჰავებენ ანუ დასცინიან. ხვალ გამოვლენ და ცხოველთა უფლებებზე ლექციებს წაგვიკითხავენ…
ეს ფარისევლები… ეს ფაშისტები…”,- წერს ვატო შაქარიშვილი.
