პარტია „ხალხის ძალის“ წევრი, ანალიტიკოსი დავით ქართველიშვილი სტრასბურგის სასამართლოს მიერ გამოტანილი განაჩენებისა და ბოლო დროს სხვადასხვა ქვეყანაში სამართლებრივ საკითხებთან დაკავშირებული ხარვეზების ფონზე, სოციალურ ქსელში ანალიტიკურ მიმოხილვას ავრცელებს, რომლითაც აშშ-ისა და ევროკავშირის საელჩოებს მოუწოდებს, ბოდიში მოუხადონ ქართველ მოსამართლეებს მათი უსამართლო დისკრედიტირების გამო.
„ქვეყანაში განვითარებული პროცესების, სტრასბურგის სასამართლოს მიერ ბოლო დროს გამოტანილი გადაწყვეტილებებისა და მსოფლიოში მიმდინარე მოვლენების ფონზე, ყოველგვარი პოლიტკორექტულობის გარეშე, თამამად შეგვიძლია განვაცხადოთ, რომ:
აშშ-ისა და ევროკავშირის საელჩოები ღიად უჭერდნენ მხარს ქართველ კრიმინალებს, პირდაპირ თუ ირიბ მონაწილეობას იღებდნენ მათი პატიმრობიდან დახსნაში;
აშშ და ევროკავშირი, თავიანთი ოფიციალური წარმომადგენლების სახით, უსამართლოდ დაესხნენ თავს ქართველ მოსამართლეებს და მათ მიმართ ნაწილობრივი სანქციების დაწესებას მიმართეს;
ევროკავშირის ელჩი უსამართლოდ უწევს ქართულ სასამართლო სისტემას დისკრედიტაციას საკუთარ ქვეყანაში – პოლონეთში იუსტიციის ყოფილი მინისტრის კორუფციაში მხილების ფონზე;
ევროკავშირის ელჩი უსამართლოდ ითხოვს ქართველი მოსამართლეების იმ უცხოური ორგანიზაციების მონაწილეობით დანიშვნას, რომლებიც არაერთ კორუფციულ სკანდალში გაეხვივნენ უკრაინასა და მოლდოვაში ე.წ. კეთილსინდისიერებისა თუ „ვეტინგის” კომისიების მუშაობის ფარგლებში.
მოსამართლე ლაშა ჩხიკვაძეს მოვუწოდებ: საკუთარი პროფესიული და პიროვნული ღირსების დაცვის მიზნით, შესაბამისი სარჩელით მიმართოს სტრასბურგის ადამიანის უფლებების დაცვის სასამართლოს;
აშშ-სა და ევროკავშირის საელჩოებს მოვუწოდებ: ბოდიში მოუხადონ კონკრეტულ ქართველ მოსამართლეებს მათი უსაფუძვლო და უსამართლო დისკრედიტირების გამო“, – წერს დავით ქართველიშვილი.
