„ტყუილია ის, რომ ეს არის რუსული კანონი. ვინ იტყვის ტყუილს, არ აქვს მნიშვნელობა და არ აქვს მნიშვნელობა, ვინ შეჰყვება ტყუილ ნარატივს, – ჩვენ ქართველ ხალხს ჩვენი პასუხისმგებლობიდან, დამოუკიდებლობისა და სუვერენიტეტის ხარისხიდან, ეროვნული თავმოყვარეობის ხარისხიდან გამომდინარე უნდა ვუთხრათ, ვინც არ უნდა იყოს, წმინდანების დონეზე არავინ არ უნდა ავიყვანოთ, ეს ადამიანი ავრცელებს არასწორ ინფორმაციას“, – განაცხადა „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა მამუკა მდინარაძემ გამჭვირვალობის კანონზე საუბრისას.
„რატომ შეიძლება, ჩაეკეტოს ევროპისკენ გზა ქვეყანას, თუ ის მიიღებს ანალოგიურ კანონს, რაც არის მიღებული აშშ-ში, ისრაელში, ავსტრალიაში და რომელსაც განიხილავს ევროკავშირი? წარმოუდგენელია, რომ რუსული დაარქვას რომელიმე ელჩმა იმ კანონს, რომელსაც თავად ევროკავშირი განიხილავს. ანუ ჩვენთვის მნიშვნელობა არ აქვს, ვინ მიაწოდებს არასწორ ინფორმაციას საზოგადოებას. ჩვენ გვაქვს იმის ძალა და დამოუკიდებლობის ის ხარისხი, რომ ქართველ ხალხს ვუთხრათ: თუ მეგობარი ქვეყნის, პარტნიორი ქვეყნის წარმომადგენელი ტყუილს ეტყვის, უკვე, საბედნიეროდ, იმის ძალა გაგვაჩნია, რომ ვუთხრათ – ეს არის ტყუილი. არ აქვს მნიშვნელობა, ვინ მიაწოდებს საზოგადოებას არასწორ ინფორმაციას, ჩვენ უნდა გაგვაჩნდეს იმის ძალა და დამოუკიდებლობის ის ხარისხი, რომ არასწორ ინფორმაციას დავარქვათ არასწორი ინფორმაცია. ასე, უბრალოდ – “რუსული კანონია და დამთავრდა” – არ გამოვა. იქიდან გამომდინარე, რომ ეს არის კანონი, რომელიც ითვალისწინებს დეკლარირების ვალდებულებას და ამაში რა არის რუსული არგუმენტი, მეორე წინადადების სახით, ნებისმიერმა ადამიანმა უნდა მოაყოლოს“, – განაცხადა მამუკა მდინარაძემ.
