,,ქართული ოცნება – დემოკრატიული საქართველოს” ზუგდიდის დელეგატობის კანდიდატის – დავით კოდუას მხარდასაჭერად, ზუგდიდში საქართველოს პირველი პრეზიდენტის შვილი გიორგი გამსახურდია და ჩეჩნეთის პირველი პრეზიდენტის, ჯოხარ დუდაევის ვაჟი – დეგი დუდაევი იმყოფებიან.
დავით კოდუას თქმით, თავისუფლებისთვის მებრძოლი ორი დიდი კავკასიელის შვილების გვერდით დგომა უდიდესი პასუხისმგებლობაა.
მმართველი პარტიის დელეგატობის კანდიდატი გიორგი გამსახურდიასა და დეგი დუდაევს მხარდაჭერისთვის მადლობას უხდის და მათთან ერთად გადაღებულ ფოტოს აქვეყნებს.
,,თავისუფლებისთვის მებრძოლი ორი დიდი კავკასიელის, მეოცე საუკუნის უდიდესი გმირების – ზვიად გამსახურდიასა და ჯოხარ დუდაევის შვილების ჩემ გვერდით დგომა არის უდიდესი პასუხისმგებლობა.
საქართველოს და ჩეჩნეთის პირველ პრეზიდენტებს, ამ ისტორიულ პირებს კავკასიელი ხალხებისა და საქართველოს უდიდესი სიყვარული აერთიანებდათ. ჩვენც ეს უპირველესი გრძნობა გვამოძრავებს.
მადლობა გიორგი გამსახურდიასა და დეგი დუდაევს, რომ აქ, ჩემ გვერდით, ზუგდიდში არიან და ქართული ინტერესების დასაცავად დგანან – მხოლოდ მშვიდობით, ღირსებით და კეთილდღეობით გასავლელ ევროპულ გზაზე.
ჩვენ ერთობით გავიმარჯვებთ!” – წერს კოდუა.
