“ჩვენ მაშინდელ პოლიტიკოსებს ვეკითხებით: რატომ აქციე რეზერვისტები საზარბაზნე ხორცად; რატომ არ იყო არავითარი გეგმა; რატომ აქციე ჯარი, ჯარისკაცები საზარბაზნე ხორცად. ასევე, ვსვამთ კითხვას: რატომ არ დაბრუნდა თავის შვილებთან და ოჯახში გიორგი ანწუხელიძე; რატომ ჩავარდა ის ტყვედ; ეს გარდაუვალი იყო თუ შეიძლებოდა ამის თავიდან აცილება”, – განაცხადა პარლამენტის ვიცე-სპიკერმა, დროებითი საგამოძიებო კომისიის თავმჯდომარემ თეა წულუკიანმა.
„ის გმირი რომ ჩავარდა ტყვედ, შემდეგ, რა თქმა უნდა, საკუთარი თავი სეპარატისტებთან და რუსებთან პირისპირ რომ აღმოაჩინა, გმირობა აჩვენა. არა მხოლოდ მან, სხვათა შორის. ვინც გუშინ და გუშინწინ განერვიულდნენ ჩვენი სხდომების გამო, რატომ არ ახსენებენ უშანგი სოფრომაძეს? იქ გიორგი ანწუხელიძე მარტო არ იყო; იქ იყვნენ უშანგი სოფრომაძე, კახაბერ ხუბულური. რატომ არ დაუბრუნდა უშანგი სოფრომაძე თავის მეუღლესა და შვილებს? – ეს არის შეკითხვები – შეიძლებოდა თუ არა პოლიტიკოსების მიერ ამის თავიდან აცილება.
ჩვენი მიზანია, ყველამ გაიგოს: ვინც არ უნდა მოხვიდეთ, ახალგაზრდებო, მომავალში პოლიტიკაში, უნდა იცოდეთ, რომ ჯარი არ არის სათამაშო. სააკაშვილმა ჯარიც და მშვიდობიანი მოსახლეობაც და, სხვათა შორის, ის ორი გენერალიც, რომელიც აქ მობრძანდა, საკუთარ სათამაშოდ აქცია.
შესაბამისად, ჩვენ ამ მიმართულების კვლევას გავაგრძელებთ და, ბუნებრივია, ის პოლიტიკოსები, ვინც მაშინ იყვნენ ხელისუფლებაში, და დღეს ზოგიერთი ციხეშია, ზოგიერთი ქუჩაშია და ზოგიც გაქცეულია, რა თქმა უნდა, ღელავენ, რა თქმა უნდა, ცდილობენ, რაც შეიძლება მეტ ადამიანს აუმღვრიონ გონება და აფიქრებინონ, თითქოს, ეს კომისია არის იმისთვის, რომ ჯარის ქმედებები შეაფასოს“, – განაცხადა თეა წულუკიანმა.
