„გლობალურმა ომის პარტიამ”, ადგილობრივი აგენტურის – რადიკალური ოპოზიციის მეშვეობით განიზრახა, ქართველ ხალხს საქართველოს სუვერენიტეტი ჩამოართვას და ამისათვის შტურმი ბიძინა ივანიშვილზე მიიტანეს“, – წერს „ფეისბუკის“ საკუთარ გვერდზე „ხალხის ძალის“ ერთ-ერთი ლიდერი დიმიტრი ხუნდაძე.
მისი თქმით, ავანსცენაზე გამოვიდნენ მწამებლები, მევახშეები, უსამშობლოები, ყველაფრისმკადრებლები და წარმოდგენას დგამენ, თითქოს “ლელო” “ნაცმოძრაობას” ემიჯნება, პრეზიდენტი მესამე ძალას ქმნის და გახარია “ზურგით დგას” რადიკალურ ოპოზიციასთან.
მისივე შეფასებით, ეს ყველაფერი უნიჭო სატყუარაა, რაზეც საზოგადოება არ წამოეგება.
„ბიძინა ივანიშვილს ებრძვიან იმის გამო,რომ ის მათთვის კედელი აღმოჩნდა. ეს “კედელი” 2012 წელს მან ხალხთან ერთად ააგო და მყარ ფუნდამენტზე დგას, რომელიც უზრუნველყოფს ქვეყანაში მშვიდობას, რეალურ სუვერენიტეტს, პოლიტიკურ სტაბილურობასა და ქვეყნის უწყვეტ, მრავალმხრივ განვითარებას.
უსამშობლოობა, ქვეყნის შიგნით თუ გარეთ უპირობო მორჩილება, ბიზნესის რეკეტი, ტელევიზიების პირდაპირ ეთერში დევნა, ქუჩაში განაჩენი და ქართველი ხალხის ღირსების აყრა საქართველოში ვეღარ დაბრუნდება. ამის გარანტი კი ბიძინა ივანიშვილის მიერ 2012 წელს ხალხთან ერთად უკვე მოგებული ბრძოლაა, რომელსაც ბიძინა ივანიშვილი, ისევ ხალხთან ერთად, 2024 წელსაც არჩევნებში კიდევ ერთხელ დაიცავს.
ის, რომ არჩევნებს მმართველი გუნდი აუცილებლად მოიგებს, ოპოზიციამაც და მათმა პატრონებმაც კარგად იციან. ამიტომ ისინი, არჩევნებზე მეტად, არჩევნების შემდგომი პერიოდისთვის ემზადებიან და “გაყალბებულ არჩევნებზე” ახლავე იწყებენ საუბარს, რაც შედეგიანი მათთვის არც ამ შემთხვევაში არ იქნება“, – წერს დეპუტატი.
