„და მაინც, ვინ და რატომ ებრძვის ასე გაშმაგებული ჩვენს თანამედროვე ცივილიზაციას და, მათ შორის, საქართველოს. წმ. იოანე ღვთისმეტყველის “გამოცხადებაში” ამაზეც იძებნება პირდაპირი მინიშნება…” – წერს სოციალურ ქსელში „ხალხის ძალის“ წევრი დავით ქართველიშვილი.
“და მეხუთემან ანგელოზმან დასცა საყჳრსა, და ვიხილე ვარსკულავი, რომელი გარდამოვარდა ზეცით ქუეყანად და მიეცა მას კლიტე ჯურღმულისა მის უფსკრულისაჲ.
და აღჴდა კუამლი ჯურღმულისა მისგან, ვითარცა კუამლი ცეცხლისა მოტყინარისაჲ, და დაბნელდა მზე და ჰაერი კუამლისა მისგან ჯურღმულისა”.
ჯურღმულიდან გამოშვებულ იქნა ფსევდოლიბერალიზმის, ფსევდოტოლერანტობის და ფსევდოჰუმანიზმის ბნელი კვამლი და მოედო მთელ ტრადიციულ, თვითმყოფად, კონსერვატიულ და ქრისტიანულ სამყაროს…
“და კუამლისა მისგან გამოვიდეს მკალნი ქუეყანად. და მიეცა მათ ჴელმწიფებაჲ, ვითარცა აქუს ჴელმწიფებაჲ ღრიაკალთა ქუეყანისათა.
და ითქუა მათა მიმართ, რაჲთა არა ავნონ თივასა ქუეყანისასა, არცა ყოველსა მწუანვილსა, არცა ხეთა, არამედ კაცთა, რომელთა არა აქუს ბეჭედი ღმრთისაჲ შუბლთა ზედა მათთა”.
ამ მკალთა (კალიების) ზეგავლენა და ხელმწიფება ადამიანის, მისი ფიზიკური და სულიერი ბუნების გაუკუღმართებულ გარდაქმნაზე ვლინდება მხოლოდ. ფლორასა და ფაუნას არ ეხება, პირიქით, მათ, “ფრთადაკარგული პეპლების გადარჩენის საზოგადოებისა” თუ “გირჩნაკლულ წიწვოვანთა შველის ასოციაციის” სახელით, ფსევდოჰუმანურობით შეცდომაში შეჰყავთ ის ადამიანები, რომლებშიც უფლისმიერი ხატისა და მსგავსების, “გენდერული ბუნების” რეფორმაცია უნდა მოახდინონ. ერთადერთი, ვისზეც ვერ განხორციელდება ეს მავნე ზეგავლენა: “შუბლზე ღმრთის ბეჭდის”, მყარი ტრადიციული, პატრიოტული და სარწმუნოებრივი პრინციპების მქონე ადამიანებია…
“და მიეცა მათ, რაჲთა არა მოკლნენ იგინი, არამედ რაჲთა იტანჯნენ ხუთ თუე. და ტანჯვაჲ მათი, ვითარცა ტანჯვაჲ ღრიაკალისაჲ, რაჟამს უცის კაცსა. და მათ დღეთა შინა ეძიებდენ კაცნი სიკუდილსა და ვერ პოონ და სუროდის მოკუდომად და ივლტოდის მათგან სიკუდილი”.
აქ “ხუთი თვე”, რა თქმა უნდა, გადატანითი მნიშვნელობისაა, მიესადაგება კალიების (მკალთა) წლიური აქტიურობის ხანგრძლივობას, ანუ, ფსევდოლიბერალიზმი განწირულია მოკლევადიანი “გამეფების” შემდგომ გარდაუვალ დასამარცხებლად. მაგრამ მისი დამანგრეველი კვალი ცივილიზაციურ ტრადიციებზე და ადამიანურ ბუნებაზე, რა თქმა უნდა, უმძიმესი იქნება…
“და აქუს მათ ზედა მეფედ ანგელოზი იგი უფსკრულისაჲ. სახელი მისი ებრაელებრ: ავადონ, ხოლო ბერძლებრ აქუს სახელი აპოლიონ”.
აპოკალიფსურმა “გამოცხადებამ” ამ მკალთა, ამ მოკლევადიანი უბედურების მომტანი ხელმწიფის სახელიც გაგვანდო – ავადონ. სწორედ, მის მოჯადოებულ ტყვეობაში ჩავარდა დღეს თანამედროვე ცივილიზაცია, მათ შორის – ჩვენი დების, ძმების, შვილებისა და შვილიშვილების დიდი ნაწილი.
მაგრამ ხელმწიფება მისი არახანგრძლივი იქნება; შესაძლოა, მისი ერთ-ერთი ბოლო გაფართხალების მოწმენიც კი ვართ.
ამიტომ ებრძვიან ავადონი და მისი აქაური მკალნი ეშმაკეული შეპყრობით, ასეთი გაშმაგებით საქართველოს ერთადერთ კუთხეს კაცობრიობის ისტორიაში, სადაც მომავალი ანტიქრისტე ტახტს ვერ დაიდგამს.
ამიტომ, აუცილებლად იქნება მიღებული ჩვენი ტრადიციული ფასეულობების დამცველი კანონი, რამეთუ დადგა ამის დრო, უკვე გაცხადებული და გააშკარავებული საფრთხეების გამო.
ხოლო, საკუთარი თავების კიდევ ერთი ლუსტრაციის წინაშე მყოფნი, ვერანაირი ადგილობრივი მკალნი და მათი მფარველი ავადონი ჩვენ ამაში ხელს ვერ შეგვიშლიან“, – წერს ქართველიშვილი.
